Surxondaryo viloyatida noqonuniy ov qilib yurganlar aniqlandi, deb xabar berdi Ekologiya vazirligi matbuot xizmati.
Maʼlum qilinishicha, Muzrabot tumani “Ipak yo‘li” mahallasida yashovchi fuqaro X.R., Sho‘rchi tumani A.Safarov SIUda yashovchi fuqaro Sh.R., “Oxunboboyev” SIUda yashovchi fuqaro B.O., “Alpomish” mahallasi fuqarosi A.B., “Bunyodkor” mahallasida yashovchi fuqaro R.X., fuqaro Ch.A. va M.A. ruxsatnomasisiz ov qilish talablariga rioya qilmagan.
Ular o‘ziga tegishli bo‘lgan ov qurollari bilan Muzrabot tuman “Ipak yo‘li” mahallasidagi Sholipoya massivida ov qilib yurganligi maʼlum bo‘ldi.
Mazkur holat yuzasidan fuqarolarning har biriga nisbatan Maʼmuriy javobgarlik to‘g‘risidagi kodeksning 90-moddasi 1-qismiga (ov qilish va baliq ovlashning taqiqlangan qurollarini yoki vositalarini tayyorlash, olib kirish, saqlash, tashish yoki yuborish, olish yoxud sotish) asosan BHMning 20 barobari — 7,5 mln so‘mdan, jami 52,5 mln so‘m maʼmuriy jarima chorasi qo‘llanildi.
Avvalroq Aydar-Arnasoy ko‘llarida 2024-yili noqonuniy ov oqibatida tabiatga 1,7 mlrd so‘mlik zarar yetkazilgani haqida xabar berilgandi.
Shuningdek, Navoiyda noqonuniy baliq ovlagan shaxslar tabiatga 6,3 mlrd zarar yetkazgani haqida xabar berilgandi.
Bundan tashqari, Surxondaryo viloyati Sho‘rchi tumanida noqonuniy baliq ovlanishi natijasida tabiatga 1,4 milliard so‘m zarar yetkazilgan edi.
O‘zbekiston hududida 2025-yil 1-sentyabrdan 2028-yil 1-yanvargacha ov qilishga moratoriy joriy qilinishi mumkinligi aytilgandi.
Izoh (0)