Айдар-Арнасой кўллари тизимида ўнлаб қоидабузарликлар аниқланиб, юзлаб ноқонуний тўрлар олиб қўйилди. Бу ҳақда Экология вазирлиги хабар берди.
Маълум қилинишича, 2025 йилнинг январь февраль ойларида 125 та рейдлар ўтказилди.
Рейдлар давомида 94 та қоидабузарлик қайд этилган. Жами жарималар миқдори 423 млн сўмни, табиатга етказилган зарар эса 28 млн 136 минг сўмни ташкил этди.
Шунингдек, 26—28 февраль кунлари Айдар-Арнасой кўллари ҳудудида сувда қолиб кетган ноқонуний балиқ овлаш тўрларини бартараф этиш бўйича рейд ўтказилди.
Натижада Навоий вилоятидаги Айдаркўлдан ҳар бири 100 метр узунликдаги 100 дона, Тузкон кўлидан ҳар бири 100 метр узунликдаги 70-80 дона, Арнасой кўлидан эса ҳар бири 100 метр узунликдаги 50-60 дона тўр олиб ташланди.
Аввалроқ Айдар-Арнасой кўлларида 2024 йили ноқонуний ов оқибатида табиатга 1,7 млрд сўмлик зарар етказилгани ҳақида хабар берилганди. Навоийда ноқонуний балиқ овлаган шахслар табиатга 6,3 млрд зарар етказгани ҳақида хабар берилганди.
Шунингдек, Сурхондарё вилояти Шўрчи туманида ноқонуний балиқ овланиши натижасида табиатга 1,4 миллиард сўм зарар етказилган эди.
Изоҳ (0)