Toshkent shahrida belgilanmagan joylarga chiqindi tashlayotganlar qarshi ommaviy reyd boshlangani e’lon qilingandi. Bir kunda o‘tkazilgan reyd davomida qoidabuzarlardan jami 11 million so‘mdan ortiq jarima undirildi.
Ekologiya, atrof-muhitni muhofaza qilish va iqlim o‘zgarishi vazirligining ma’lum qilishicha, 12-mart kuni o‘tkazilgan reyd davomida poytaxt hududida bir kunning o‘zida chiqindi tashlash bilan bog‘liq 16 ta huquqbuzarlik aniqlandi.
Huquqbuzarlarga Ma’muriy javobgarlik to‘g‘risidagi kodeksning 91-1-moddasi 1-qismi bilan ma’muriy bayonnoma rasmiylashtirildi va jami 11 million 375 ming so‘m jarima qo‘llanildi.
Ayni paytda reyd tadbirlari davom ettirilmoqda. Ushbu reydlar huquq-tartibot organlari bilan hamkorlikda olib borilmoqda.
Chiqindilarini belgilanmagan joylarga tashlaganlik uchun jarima miqdori
Ma’muriy javobgarlik to‘g‘risidagi kodeksning 91-1-moddasiga ko‘ra, belgilanmagan joylarga qattiq maishiy va qurilish chiqindilarini tashlash, shuningdek suyuq maishiy chiqindilarni to‘kish
- fuqarolarga BHMning 1 baravaridan 3 baravarigacha (375 ming so‘mdan 1 million 125 ming so‘mgacha),
- mansabdorlarga esa 10 baravaridan 20 baravarigacha (3 million 750 ming so‘mdan 7 million 500 ming so‘mgacha) miqdorda jarima solishga sabab bo‘ladi.
Xuddi shunday huquqbuzarlik ma’muriy jazo chorasi qo‘llanganidan keyin bir yil davomida takror sodir etilsa:
- fuqarolarga BHMning 5 baravaridan 10 baravarigacha (1 million 875 ming so‘mdan 3 million 750 ming so‘mgacha )
- mansabdorlarga BHMning 20 baravaridan 30 baravarigacha (7 million 500 ming so‘mdan 11 million 250 ming so‘mgacha) miqdorda jarima solinadi.
Maishiy va qurilish chiqindilari poligonlariga joylashtirilishi kerak bo‘lgan chiqindilarni belgilanmagan joylarga tashlash
- fuqarolarga BHMning 5 baravaridan 10 baravarigacha,
- mansabdorlarga BHMning 20 baravaridan 30 baravarigacha miqdorda jarima solishga sabab bo‘ladi.
Huquqbuzarlik 1 yil davomida takror sodir etilsa, fuqarolarga BHMning 10 baravaridan 15 baravarigacha (375 ming so‘mdan 5 million 620 ming so‘mgacha), mansabdorlarga esa 30 baravaridan 50 baravarigacha (11 million 250 ming so‘mdan 18 million 750 ming so‘mgacha) miqdorda jarima tayinlanadi.
Izoh (0)