Toshkent viloyati Yangiyo‘l tumanida ikki fuqaro 52 ta kaptarni nobud qildi. Bu haqda Ekologiya vazirligi xabar berdi.
Unda aytilishicha, Toshkent viloyati Ekologiya, atrof-muhitni muhofaza qilish va iqlim ozgarishi boshqarmasi tomonidan hayvonot dunyosini muhofaza qilishga qaratilgan navbatdagi nazorat tadbiri o‘tkazilgan. Yangiyo‘l tumani hududida o‘tkazilgan reydda fuqarolar N.R. hamda N.S. tomonidan 52 ta kaptar noqonuniy ravishda ovlangani aniqlangan.
Natijada tabiatga 19 million 500 ming so‘m miqdorda zarar yetkazilgan. Holat yuzasidan huquqbuzarlarga nisbatan Ma’muriy javobgarlik to‘g‘risidagi kodeksning 90-moddasi 4-qismi bilan ma’muriy bayonnoma rasmiylashtirildi.
Holatga qonuniy baho berish uchun hujjatlar jinoyat ishlari bo‘yicha Yangiyo‘l tumani sudiga yuborilmoqda.
Ma’lumot uchun, O‘zbekiston Respublikasining 2020-yil 8-iyuldagi “Ov qilish va ovchilik xo‘jaligi to‘g‘risida”gi 627-sonli qonuniga muvofiq, joriy yilning 1-martidan 15-avgustga qadar ov mavsumi yopildi. Bu vaqtda yovvoyi hayvonlar va qushlarni ovlash qat’iyan taqiqlanadi.
Avvalroq Aydar-Arnasoy ko‘llarida 2024-yili noqonuniy ov oqibatida tabiatga 1,7 mlrd so‘mlik zarar yetkazilgani haqida xabar berilgandi.
Shuningdek, Navoiyda noqonuniy baliq ovlagan shaxslar tabiatga 6,3 mlrd so‘m zarar yetkazgani haqida xabar berilgandi.
Bundan tashqari, Surxondaryo viloyati Sho‘rchi tumanida noqonuniy baliq ovlanishi natijasida tabiatga 1,4 milliard so‘m zarar yetkazilgan edi.
O‘zbekiston hududida 2025-yil 1-sentyabrdan 2028-yil 1-yanvargacha ov qilishga moratoriy joriy qilinishi mumkinligi aytilgandi.
Izoh (0)