Surxondaryo viloyatidagi Surxon daryosidan qum qazib olganlar jami 78 mln so‘m to‘laydigan bo‘ldi. Bu haqda viloyat Ekologiya boshqarmasi xabar berdi.
Keltirilishicha, Ekologiya boshqarmasi va viloyat Milliy gvardiya boshqarmasi xodimlari hamkorligida viloyat bo‘ylab tungi nazorat reyd tadbirlari o‘tkazildi. Tezkor tadbirlar davomida Jarqo‘rg‘on tumani “Yangi usul” mahallasi hududidan oqib o‘tuvchi Surxon daryosi bo‘yida noqonuniy qum qazish holati aniqlandi.
Jarqo‘rg‘on tumani “Dam” mahallasi fuqarosi B.Y. o‘z boshqaruvidagi Frontal yuklagich (lephur) yordamida qum xomashyosini noqonuniy ravishda yuklayotgan bo‘lgan. Shuningdek, A.S. va “Polvonlar yurti” mahallasi fuqarosi T.I. esa o‘z boshqaruvidagi “KamAZ” va Howo rusumli yuk mashinalariga ushbu qumni ortib ketayotgan bo‘lgan.
Tadbir davomida ushbu qonunbuzarlik holati rasmiylashtirilib, barcha shaxslarga nisbatan Ma’muriy javobgarlik to‘g‘risidagi kodeksning 70-moddasi 1-qismi asosida ma’muriy choralar ko‘rildi.
Har bir qoidabuzarga 11 million 250 000 ming so‘m (BHMning 30 barobari) miqdorida jarima belgilanib, tabiatga yetkazilgan 45 million so‘m zarar hisoblandi. Jami hisobda 78 million 750 000 so‘m miqdorida ma’muriy chora ko‘rildi.
Daryolar o‘zanlaridagi noruda materiallarni qazib olishga muddatsiz moratoriy joriy etilgan
Prezident farmoni bilan Chirchiq, Sangzor, Zarafshon, Norin, Qashqadaryo, Surxondaryo va Sirdaryo daryolari o‘zanlaridagi noruda materiallarni qazib olishga 2024-yil 1-maydan muddatsiz moratoriy joriy qilindi. Noqonuniy qazib olish ishlari natijasida tabiatga yetkazilgan zarar uchun javobgarlik ham kuchaytirildi.
Shunga qaramay, noqonuniy qum-shag‘al qazib olish davom etmoqda. 12-fevral kuni Surxondaryo va Toshkent viloyatlarida tabiiy qum xom ashyosini o‘zboshimchalik bilan qazib olish holatlari fosh etildi. Toshkent viloyati Bekobod tumanida noqonuniy ravishda qum qazib olinishi oqibatida tabiatga 100 milliard so‘mdan ortiq zarar yetkazildi.
13-yanvarda Samarqandning ikki hududida qum-shag‘al qazib olinishi oqibatida tabiatga 826 milliard so‘m zarar yetkazilgandi.
Izoh (0)