Kanadaning yangi bosh vaziri Mark Karni AQSH bilan savdo munosabatlari keskinlashayotgan bir paytda “ishonchli ittifoqchilar”, jumladan, Fransiya bilan aloqalarni mustahkamlash niyatini bildirdi.
Bundan oldin Karni AQSHning o‘z mamlakatiga nisbatan bojxona to‘lovlarini oshirganini sharhlayotib, bu kanadaliklarga qarshi hujum ekanligini ta’kidlagandi. U shuningdek, Ottavaning javob choralari AQSHga maksimal darajada ta’sir qilishi, Kanadaga esa minimal darajada zarar yetkazishiga ishonch hosil qilishini va’da bergandi.
“Bugun biz dunyo bo‘ylab tobora ko‘proq hukumatlar suverenitet va xavfsizlik tamoyillarini rad etayotganini ko‘rayotgan bir paytda, Kanada uchun Fransiya singari ishonchli ittifoqchilarimiz bilan aloqalarni mustahkamlash har qachongidan ham muhimroq. Biz o‘zimizning, ittifoqchilarimizning va butun dunyoning xavfsizligini ta’minlash uchun mamlakatlarimiz o‘rtasidagi hamkorlikni kuchaytirishimiz lozim”, dedi Karni Fransiya rahbari Emmanuel Makron bilan o‘tkazilgan matbuot anjumanida.
Xususan, Kanadaning yangi bosh vaziri Fransiya bilan diplomatik aloqalarni chuqurlashtirish, shuningdek iqtisodiyotni rivojlantirish uchun “tadbirkorlar uchun ko‘proq imkoniyatlar yaratish” istagini bildirgan.
Karni o‘zining birinchi xorijiy tashrifi uchun nega Parijni tanlaganiga izoh berarkan, “chunki kanadaliklar Fransiyani yaxshi ko‘radilar” degan. Shuningdek, u Kanadani “Yevropaga mansub bo‘lmagan davlatlar orasida eng yevropacha” deb ta’riflagan.
Izoh (0)