Qozog‘istonlik sobiq sportchi Musa Abdrayim Jahon boks kengashi (WBC) tomonidan “Yer yuzidagi eng jasur inson” unvoni bilan taqdirlandi. Bu haqida Jahon boks kengashi o‘z ijtimoiy tarmoqlari orqali xabar berdi.
7-mart kuni Olmaotadagi aeroportning ichki reyslar terminalida xavfli hodisa yuz berdi. Noma’lum shaxs yo‘lovchi sifatida ichkariga kirgan. Aeroport xavfsizlik xodimi undan hujjat so‘ragan. Lekin kutilmaganda noma’lum fuqaro ayol xodimning sochidan tortib, unga pichoq bilan tahdid qila boshladi.
Bu paytda qozog‘istonlik Musa Abdrayim voqeaga aralashib, jinoyatchining qo‘lidagi pichoqni tortib oldi va uni zararsizlantirdi.
Men faqat qichqiriq eshitdim va o‘sha tomonga yugurdim. Erkak ayolning sochidan tortib, pichoq bilan tahdid qilayotganini ko‘rganimda, uni qutqarishga harakat qildim. O‘sha paytda: “Agar u mening qizim bo‘lsa-chi?” deb o‘yladim. Keyin esa shunchaki burchimni bajardim, dedi Abdrayim.
Jahon boks kengashi uning jasoratini yuksak baholab, bu harakat yaxshilik va birdamlikning asl namunasi ekanini ta’kidladi.
Ma’lumot uchun, 52 yoshli Musa ilgari jangovar san’at, kikboksing va tay boks bilan shug‘ullangan bo‘lib, bir qancha medalga ham ega chiqqan.
Izoh (0)