Avvalroq o‘zbekistonlik bokschi Bahodir Jalolovning Kanadadagi jangi bekor qilingani haqida xabar berilgandi. Bokschi The Ring nashriga intervyu berdi.
Jalolov har doim jangga tayyor bo‘lgan barcha raqiblarini hurmat qilishini aytdi.
“Barchasini ring ko‘rsatadi. Men tayyorman, katta janglarni intiqlik bilan kutyapman. Maqsadim faqat chempion bilan katta janglarga chiqish, boshqa yo‘l yo‘q. Agar menga ikki-uch oy vaqt berishsa, Usik bilan jang qilishga tayyor bo‘lardim, bu do‘stona chaqiruv. Usik va Joshua bilan kuchimni solishtirish menga juda qiziq, chunki ular ham Olimpiya chempioni. Ular professional boksda katta muvaffaqiyatlarga erishdilar”, deydi Olimpiada chempioni.
Maʼlumot o‘rnida, Jalolov professional faoliyatida 14 ta jang o‘tkazgan va barchasida nokaut evaziga g‘alaba qozongan. Uning so‘nggi jangi 2023-yilda Toshkentda o‘tkazilgan boks oqshomida Janubiy Afrika vakili Kris Tompsonni birinchi raundning o‘zida mag‘lub etgandi. Spilmont esa oxirgi jangini 2024-yilda o‘tkazgan va o‘shanda Artem Charniakevichni 4-raundda nokautga uchratgan.
Izoh (0)