UFC’ning og‘ir vazn toifasida sobiq chempion Frensis Ngannu 49 yoshli ukrainalik sobiq super og‘ir vazn toifasida jahon chempioni Vladimir Klichko bilan jang o‘tkazish imkoniyati haqida gapirdi.
“Mening shartnoma bo‘yicha yana bir nechta jangim bor. Riko Verxoven bilan ham jang o‘tkazishim mumkin, lekin aniq emas. Bundan tashqari, Derrek Chisora va Vladimir Klichkolar ham variantlar orasida bor. Men albatta keyingi jangimni boksda o‘tkazmoqchiman va har qanday raqibga tayyorman”, — deya Ngannuning so‘zlarini keltiradi Sportsboxreview nashri.
Eslatib o‘tamiz, Ngannu so‘nggi rasmiy jangini 2024-yil oktabr oyida o‘tkazgan. U o‘sha kungi jangda braziliyalik Renan Ferreyra ustidan g‘alaba qozonib, PFL (Professional Fighters League) og‘ir vazn chempioniga aylangan edi.
Klichko esa 2017-yilda faoliyatini yakunlagan. U oxirgi jangini sobiq jahon chempioni Entoni Joshua bilan o‘tkazib, 11-raundda texnik nokaut bilan mag‘lub bo‘lgandi. Ukrainalik bokschi faoliyati davomida 69 ta jangda qatnashgan. Ularning 64 tasida g‘alaba qozongan, 5 ta jangda mag‘lubiyatga uchragan.
Izoh (0)