WBA yo‘nalishida yarim o‘rta vazn toifasida majburiy daʼvogar bo‘lgan Shahram G‘iyosov WBA chempioni Eymantas Stanionis va IBF chempioni Jeyron Ennis o‘rtasida 12-aprel kuni bo‘lib o‘tadigan jangga rozilik berdi.
U bu jangga keyinchalik ushbu jang g‘olibi o‘zi bilan ringga chiqish sharti evaziga rozi bo‘lgan.
The Ring nashri WBA qarorini shunday keltiradi:
“WBA yarim o‘rta vazn chempioni Eymantas Stanionisga 12-aprel kuni Atlantik-Sitida IBF chempioni Jeyron Ennisga qarshi birlashtiruvchi jang o‘tkazish uchun maxsus ruxsatnoma berdi. WBA qoidalariga muvofiq, Stanionis jamoasi ushbu jang bo‘yicha majburiy daʼvogar Shahram G‘iyosovga murojaat qildi va u bu jangning o‘tkazilishiga rozilik berdi”.
WBA qoidalari va qaroriga ko‘ra, Stanionis va Ennis o‘rtasidagi jang g‘olibi 120 kun ichida G‘iyosovga qarshi jang o‘tkazishi shart.
Shuningdek, The Ring nashrining xabar berishicha, Shahram G‘iyosov ham 12-aprel kuni Atlantik-Sitida o‘tkaziladigan ushbu boks kechasida jang qiladi. Sportchining o‘zi “Daryo”ga ma’lum qilishicha, bu jangdagi raqibi hozircha aniq emas.
Izoh (0)