Қозоғистонлик собиқ спортчи Муса Абдрайим Жаҳон бокс кенгаши (WBC) томонидан “Ер юзидаги энг жасур инсон” унвони билан тақдирланди. Бу ҳақида Жаҳон бокс кенгаши ўз ижтимоий тармоқлари орқали хабар берди.
7 март куни Олмаотадаги аэропортнинг ички рейслар терминалида хавфли ҳодиса юз берди. Номаълум шахс йўловчи сифатида ичкарига кирган. Аэропорт хавфсизлик ходими ундан ҳужжат сўраган. Лекин кутилмаганда номаълум фуқаро аёл ходимнинг сочидан тортиб, унга пичоқ билан таҳдид қила бошлади.
Бу пайтда қозоғистонлик Муса Абдрайим воқеага аралашиб, жиноятчининг қўлидаги пичоқни тортиб олди ва уни зарарсизлантирди.
Мен фақат қичқириқ эшитдим ва ўша томонга югурдим. Эркак аёлнинг сочидан тортиб, пичоқ билан таҳдид қилаётганини кўрганимда, уни қутқаришга ҳаракат қилдим. Ўша пайтда: “Агар у менинг қизим бўлса-чи?” деб ўйладим. Кейин эса шунчаки бурчимни бажардим, деди Абдрайим.
Жаҳон бокс кенгаши унинг жасоратини юксак баҳолаб, бу ҳаракат яхшилик ва бирдамликнинг асл намунаси эканини таъкидлади.
Маълумот учун, 52 ёшли Муса илгари жанговар санъат, кикбоксинг ва тай бокс билан шуғулланган бўлиб, бир қанча медалга ҳам эга чиққан.
Изоҳ (0)