2024-yil professional boks uchun chinakam burilish yili bo‘ldi. Bu ko‘p jihatdan saudiyalik shayxlar va yakkakurashlar, umuman sportning asosiy qadrdoniga aylanib ulgurgan Turki al ash-Shayx bilan bog‘liq. U bir vaqtning o‘zida Oleksandr Usik va Tayson Fyuri o‘rtasida ikkita jang tashkillashtirishga, Dmitriy Bivol va Artur Beterbiyev o‘rtasida jang o‘tkazishga muvaffaq bo‘ldi. Va, aftidan, 2025-yil endigina boshlanganiga qaramasdan, Turkida allaqachon katta rejalar bor.
“O‘ylaymanki, shunday bo‘ladi, — deya javob berdi u boks tarixida yorqin yil bo‘lishi haqidagi savolga. — Biz juda kuchli boshladik va allaqachon ko‘plab shartnomalar tuzganmiz, lekin hammasini e’lon qilish uchun ideal vaqtni kutamiz”.
Aytish kerak bo‘lgan birinchi narsa, albatta, Bivol bilan Beterbiyev o‘rtasidagi revansh jangi. Ikki rossiyalik chempion fevral oyida yana ringga ko‘tariladi va ushbu superjangdan tashqari, turnir kardida yana oltita chempionlik jangi bo‘ladi. Daniel Dyubua, Shakur Stivenson, Chjan Chjiley, Hamza Shiraz va boshqa yetakchi bokschilar Saudiya Arabistonidagi boks oqshomini bezashadi — bunday kardni tasavvur qilishni o‘zi ajoyib.
Aprel oyida Saudiya shayxlari kichik Kris Yubenk va Konor Benn boshchiligidagi turnirni rejalashtirgan. Ikki yetakchi britaniyalik bokschi 2022-yilda to‘qnashishi kerak edi, ammo Benn taqiqlangan moddalarni iste’mol qilgani uchun diskvalifikatsiya qilingan. Bu qarama-qarshilikka bokschilarning otalari — Kris Yubenk va Nayjel Bennning o‘tmishi ham qiymat qo‘shadi. 90-yillarda ular Britaniya boksi tarixidagi eng mashhur qarama-qarshiliklardan birini boshlab bergan: birinchi jangda Yubenk Benni nokautga uchratib, chempionlik kamarini qo‘lga kiritgan va revanshda durang qayd etilgan. Endi ularning qarama-qarshiligidagi yangi tarix — o‘g‘illarning to‘qnashuvi, albatta, Britaniya jamoatchiligida katta qiziqish uyg‘otadi.
May oyi oxirida, Turki al ash-Shayxning so‘zlariga ko‘ra, 5x5 formatida yana bir turnir o‘tkazilishi rejalashtirilgan. Bunday turnirning dastlabkisi 2024-yilda bo‘lib o‘tgan, boks kechasida promouterlarning besh nafar vakili Eddi Hirn va Frenk Uorren bir-biriga qarshi kurash olib borishgan. Endi Turki uni yana takrorlamoqchi. Bundan tashqari, al ash-Shayx avgust oyidagi rejalarini promouterlar bilan muhokama qilmoqchi. Oktyabr va dekabr oylarida esa bizni ikkita yirik boks oqshomi kutmoqda, ular ustida ish olib borilmoqda. Shayx nomlarni oshkor etmayapti, lekin jarangdor turnir bo‘lishi aniq.
Turki Devin Xeyni — Rayan Garsiya o‘rtasidagi shov-shuvli jang bo‘yicha muzokaralarni muvaffaqiyatli yakunlaganini aytdi. Garsiyaning diskvalifikatsiya muddati tugaydi, shuning uchun 2025-yil oxirida yulduz bokschilar yana ringga chiqishlari mumkin bo‘ladi.
Albatta, Terens Krouford — Saul Alvares o‘rtasidagi potentsial jang Turkida yanada katta qiziqish uyg‘otmoqda. So‘nggi paytlarda jangni haqiqatan ham tashkil etishga harakat qilishayotgani va bokschilar bilan muzokaralar olib borilayotgani haqida gap-so‘zlar ko‘paymoqda. Kanelo buni bilvosita tasdiqladi, ash-Shayx ham jangga qiziqish bildirayotganini ta’kidlagan. Agar u manfaatdor bo‘lsa, demak, to‘qnashuv ertami-kechmi bo‘lib o‘tadi, buyog‘i faqat vaqt masalasi. 2025-yil esa ikki dunyo yulduzining jangini ko‘rish uchun ideal vaqt bo‘lishi mumkin.
Shuningdek, ash-Shayx yaqinda o‘zi tomonga og‘dirgan asosiy yulduzlardan biri — Naoya Inoueni e’tiboridan chetda qoldirmasligini ta’kidladi. Ikki vazn toifasida mutlaq jahon chempioni 24-yanvar kuni Kim E Junga qarshi jang qildi va 4-raundda nokaut evaziga g‘alaba qozondi. Endi Turki yaponiyalik bokschini britaniyalik yengilmas chempion Nik Boll bilan to‘qnashtirishni rejalashtirmoqda. Buning uchun Inoue yana bir vaznini ko‘tarilishi kerak bo‘ladi, ammo bu Monstr laqabli sportchi uchun muammo tug‘dirmaydigan ko‘rinadi.
“Qirollik” divizionisiz yilni yorqin deyish mushkul, albatta. Aynan super og‘ir vaznlilar 2024-yilda alohida e’tiborni tortdi va al ash-Shayx bundan keyin ham og‘ir vaznda shov-shuvli janglarni tashkil etishni rejalashtirmoqda. Oleksandr Usik — Tayson Fyuri jangidan so‘ng ukrainalik bokschi darhol Daniel Dyubua bilan ringda o‘ziga xos sterdaun o‘tkazdi va aftidan, barcha tomonlar ushbu jangdan manfaatdor, bu esa uni o‘tkazish imkoniyatini oshiradi. Ammo Turkining o‘zi Usik uchun boshqa variantni ko‘radi.
“Agar vaqtimiz bo‘lsa, kelajakda Mozes Itaumuning Oleksandr Usikka qarshi jangini ko‘rishni xohlayman. Albatta, vaqtimiz bo‘lsa va Usik faoliyatini yakunlamas”, — deydi al ash-Shayx.
Shuningdek, Shayx Tayson Fyurini ham unutmadi. Britaniyalik bokschi Turkining sevimli sportchilaridan biri va garchi “Lo‘lilar Qiroli” faoliyatini yakunlaganini e’lon qilgan bo‘lsa-da, al ash-Shayx uning ringga qaytishi uchun navbatdagi katta pul mukofoti shaklida jiddiy sabablar topa olishi mumkin. Unda esa Entoni Joshua bilan shov-shuvli jang o‘tkazish imkoniyati mavjud.
Turki al ash-Shayx o‘tgan yilda professional boks oqshomlari qanday bo‘lishi kerakligini o‘rgatdi. Saudiya shayxlarining kuch-g‘ayrati va puli tugab qolmasligiga shu bilan birga 2025-yilda ham barcha boks muxlislariga yanada yorqin va qiziqarli bellashuvlarni in’om etishiga umid qilamiz.
Izoh (0)