AQSHda hukumat samaradorligi departamenti (DOGE) rahbari Ilon Mask ish ko‘pligidan Oq uyda tunab qolayotgani ma’lum qilindi. Bu haqda manbalarga tayanib, People xabar berdi.
Uning ofisi Oq uy hududidagi Eyzenxauer ijroiya ofisi binosida joylashgan. Mask keyingi to‘rt oyni departamentda faoliyat yuritishga sarflamoqchi. U AQSH byudjetini 2 trillion dollarga qisqartirib, bu orqali inflyatsiyani 2 foizga tushirishni rejalashtirgan. Mask amaldorlar o‘rtasidagi qisqartirishlar ba’zi amerikaliklar uchun “vaqtinchalik qiyinchiliklar”ga olib kelishini tan olgandi.
Ish hajmi tufayli 53 yoshli milliarder ofisda tunab, divanda, ba’zan esa polda uxlay boshladi, deydi tadbirkorning atrofidagi ikki manba.
Mask agar hukumat mamlakatning davlat qarzi bo‘yicha siyosatini o‘zgartirmasa, AQSH amalda bankrot bo‘lishi mumkinligini aytgandi. U AQSHning NATOdagi ittifoqchilari mudofaasiga sarflayotgan xarajatlarini ham keskin tanqid qilgan.
Nima uchun amerikalik soliq to‘lovchilar Yevropaning mudofaa xarajatlarining to‘rtdan bir qismini moliyalashtirishi kerak? Bu aqlga sig‘maydi, ayniqsa, bizda juda katta byudjet taqchilligi va qarzning haddan tashqari o‘sishi mavjud bo‘lgan bir paytda, degan u.
Mask, shuningdek, ommaviy axborot vositalariga sarflanayotgan mablag‘larni “soliq to‘lovchilar pullaridan samarasiz foydalanish” deb baholagan.
11-fevral kuni Mask o‘g‘li bilan Oq uydagi matbuot anjumaniga keldi, otasi va Tramp jurnalistlarning hukumatdagi qisqartirishlar haqidagi savollariga javob berayotganda, u yuzini burishtirdi, deb yozadi ABC News. Hozirda Maskning o‘g‘li ham Oq uyda tunab qolayotgani yoki yo‘qligi noma’lum.
Izoh (0)