AQSHning 14 ta shtatidan prokuror va rasmiylar prezident Donald Tramp va Hukumat samaradorligi departamenti (DOGE) rahbari Ilon Maskni sudga bergandi. Ular Maskga berilgan keng vakolatlardan norozilik bildirgan. Oq uy bunga javoban milliarderning hukumatdagi rolini tushuntirdi.
Oq uyning sud ma’lumotnomasiga ko‘ra, Ilon Mask Hukumat samaradorligi departamenti xodimi emas. Milliarder prezident maslahatchisi bo‘lib ishlaydi.
Oq uyning boshqa katta maslahatchilari singari, Mask ham hukumat qarorlarini mustaqil ravishda qabul qilish uchun rasmiy vakolatlarga ega emas. U faqat prezidentga maslahat berishi va uning ko‘rsatmalarini yetkazishi mumkin, deyiladi ma’lumotnomada.
Oq uy sud jarayonlarida Maskning roli haqida ma’lumot berishga majbur bo‘ldi, chunki DOGE qarorlari ko‘plab da’volarga sabab bo‘ldi. Mazkur departament federal xizmatchilarni keng miqyosda qisqartirdi va Kongress tomonidan ma’qullangan xarajatlarni to‘xtatdi. Ko‘pchilik buni Maskka berilgan “nazoratdan tashqari vakolatlar” natijasi deb atadi.
Arizonadan Vashingtongacha bo‘lgan 14 ta shtat Mask, DOGE va Trampga qarshi da’vo qo‘zg‘atdi. Ular Mask o‘z vakolatlarini suiiste’mol qilayotgani va “faqat tayinlangan, Qo‘shma Shtatlarning oliy mansabdor shaxsigina amalga oshirishi mumkin bo‘lgan harakatlar”ni sodir etayotganini bildirdi.
Hech kim tomonidan saylanmagan bitta shaxs qo‘lida davlat hokimiyatining to‘planishidan ko‘ra demokratiyaga kattaroq tahdid yo‘q, deya ta’kidlanadi da’vo arizasida.
Sudya 18-fevral kuni kuni shtatlarning Mask va DOGE’ning ma’lumotlarga kirishini vaqtinchalik taqiqlash va davlat xizmatchilarini ishdan bo‘shatishni to‘xtatib turish to‘g‘risidagi talabini rad etdi.
Izoh (0)