Qashqadaryo viloyati Chiroqchi tumanida 10 kishi ikki aka-ukani kaltakladi. Bu haqda viloyat IIB xabar berdi.
Ma’lum qilinishicha, 14-fevral kuni soat 19:30 larda Chiroqchi tumanida sodir bo‘lgan. Shu tumanda joylashgan “Sharjah” sport kompleksida shug‘ullanuvchi fuqarolar o‘rtasida o‘zaro kelishmovchilik oqibatida janjal chiqqan. Muqaddam sudlangan fuqaro Q.O. to‘qqiz nafar sheriklari bilan aka-uka J.I. va J.A.ni urib tan jarohati yetkazgan.
Mazkur holat yuzasidan Chiroqchi tumani IIB huzuridagi tergov bo‘limi tomonidan Jinoyat kodeksining 277-moddasi 2-qismining “a,b” bandlari bilan jinoyat ishi qo‘zg‘atilib, ishtirokchilarning o‘n nafariga nisbatan protsessual tartibda qamoq ehtiyot chorasi qo‘llanilgan.
Bundan avval Farg‘onada kompyuter klubida janjal ko‘targan shaxslar qamoqqa olingani xabar qilingandi.
O‘zbekistonda 2024-yilda 469 568 kishi maʼmuriy javobgarlikka tortilgan. Ko‘rilgan maʼmuriy huquqbuzarlik to‘g‘risidagi ishlarning aksariyatini mayda bezorilik kabi huquqbuzarliklar bo‘lgan. 2024-yilda jinoyat ishlari bo‘yicha sudlar tomonidan 77 995 nafar shaxsga nisbatan 61 481 ta jinoyat ishi ko‘rib chiqilgan. Sudlanganlar soni 61 502 nafarni tashkil etib, shundan 20 659 kishiga ozodlikdan mahrum qilish va 39 763 nafariga boshqa turdagi jazolar tayinlangan, 1 080 nafar shaxsga shartli hukm qilingan.
Izoh (0)