Xorazm viloyati Yangiariq tumanida ichkilik sabab ota o‘z o‘g‘lini otib o‘ldirdi, kelini va nabirasiga ham o‘q uzdi. Bu haqda O‘zA xabar berdi.
Ma’lum qilinishicha, holat 19-fevral kuni Yangiariq tumanining “Yangiariq” mahallasida sodir etilgan. Ushbu mahallada yashovchi 1954-yilda tug‘ilgan shaxs oilaviy kelishmovchilik sababli 1974-yilda tug‘ilgan o‘g‘lini uyida saqlab kelayotgan ov quroli bilan qasddan otib o‘ldirgan. Shuningdek, kelini va nevarasiga ham o‘q uzib, og‘ir jarohat yetkazgan.
Ushbu jinoyat tergov-tezkor guruh tomonidan qisqa muddatda fosh etilib, gumonlanuvchi ehtiyot chorasi sifatida qamoqqa olingan. Hozir dastlabki tergov harakatlari olib borilmoqda.
Viloyat hokimi ushbu jinoyatning kelib chiqishiga sabab bo‘lgan omillar dastlabki tergov va sud organlari tomonidan batafsil o‘rganilishi, o‘z navbatida jinoyatlarning oldini olishga mas’ul bo‘lgan shaxslar hamda qotillik sodir etilgan mahalla yettiligi faoliyatiga ham tanqidiy nuqtayi nazardan baho berilishini aytdi.
Viloyat ichki ishlar boshqarmasi boshlig‘i tumanda oila, turmush doirasidagi jinoyat va huquqbuzarliklarning barvaqt oldini olish, ov quroliga ega bo‘lgan shaxslar bilan huquqiy tushuntirish, nazorat- tekshiruv tadbirlarini qat’iy o‘tkazib borish bo‘yicha mas’ullarga topshiriq va ko‘rsatmalar berdi.
Shuningdek, profilaktik tadbirlarni yetarli darajada amalga oshirmagan mas’ul xodimlarning xatti-harakatlariga baho berish maqsadida xizmatga oid tekshiruv tayinlangani ma’lum qilindi.
“Mazkur oila a’zolari bilan ko‘p marotaba suhbat o‘tkazganmiz. Mahallamiz profilaktika inspektori bilan birga borib ov qurolini to‘g‘ri saqlash borasida ham juda ko‘p profilaktik tushuntirishlarni olib bordik. Mahallamiz uchun juda yomon holat bo‘ldi bu hodisa.
Bu mudhish voqeaning asl sababchisi ichkilikdir. Spirtli ichimlikni me’yoridan ortiq iste’mol qilgan ota oila a’zolari bilan kelisholmay qolgan. O‘rtada janjal chiqib, mudhish qotillik jinoyati sodir bo‘lgan. Uch yildan buyon mahallamizda birorta jinoyat sodir etilmagan edi. Bundan keyin ham jinoyat va huquqbuzarliklarning oldini olish bo‘yicha mahalla yettiligi, faollar bilan birgalikda muntazam ishlaymiz”, deydi mahalla raisi Otabek Nazariy.
Bundan avval Andijonda 11 yoshli qizini kaltaklab o‘ldirgan erkak jazolangan edi. Shuningdek, Toshkentda tilanchilik uchun o‘zining 10 yoshli o‘g‘lidan foydalangan erkak qamalgandi. Bundan tashqari, Qashqadaryoda er-xotin uy olish maqsadida bir haftalik chaqalog‘ini 190 mln so‘mga pullagani haqida xabar berilgandi.
Izoh (0)