Ijtimoiy tarmoqlarda qaynona-kelin janjali oqibatida go‘dakka qaynoq suv to‘kilgani haqida xabarlar taraldi. Bolalar ombudsmani holat yuzasidan ma’lumot berdi.
Aniqlanishicha, voqea 27-yanvar kuni sodir bo‘lgan. Toshkent viloyati Toshkent tumanida istiqomat qiluvchi fuqaro X.M. (1999-yilda tug‘ilgan ayol) qaynonasi M.X (1966-yilda tug‘ilgan) bilan oilaviy o‘zaro janjal yuzaga kelgan. Ayol keliniga qarata ichida issiq suv bo‘lgan termosni otgan. Oqibatda suv onaning qo‘lida bo‘lgan chaqaloqqa (23 kunlik) to‘kilib, oyoq va qo‘l qismi kuygan.
Bolaga zaruriy tibbiy muolajalar ko‘rsatilishi ta’minlangan. Hozirda tuman IIB tomonidan holat yuzasidan tergovga qadar tekshiruv olib borilmoqda.
Shuningdek, holat yuzasidan nizo davom etishining oldini olish maqsadida kelinga bir oy muddatga himoya orderi berilib, qo‘yilgan cheklovlar oila a’zolariga tushuntirilgan.
Bloger Aqidaxonimning Facebok’da yozishicha, qaynona termos bilan kelining boshiga urgan. 29-yanvar kuni ayol va chaqalog‘i uchun sudmed ekspertizaga yo‘llanma berilishi kerak. Qaynona esa janjaldan ikki kun o‘tib umraga ketgan.
Ayol 35 yoshli turmush o‘rtog‘iga chaqaloqning kuygan qo‘l-oyog‘i videolarini tashlab berganida u “Ha, yaxshi bo‘pti! O‘tiraver endi, bolaga o‘zing qarab”, deb aytgan. Blogerning so‘zlariga ko‘ra, bu erkakning ikkinchi turmushi. Birinchi turmushidan ham bolasi bor, u sobiq kelin ham ajrashib qutilgan.
Yanvar oyi boshlarida Farg‘onada 2 yoshli bola enaga tufayli og‘ir jarohat olgandi. Holat yuzasidan jinoyat ishi qo‘zg‘atilgan. 7-yanvar kuni Toshkent viloyatida onasi tomonidan kaltaklangan 4 yoshli qiz vafot etdi. Ushbu holat yuzasidan ham jinoyat ishi qo‘zg‘atilib, ayol qamoqqa olingan.
Izoh (0)