Go‘yo dahshatni his etgandek, mashhur xonanda uni xavotirga soladigan yagona inson — bu uning merosxo‘ri ekanligini takrorlashdan charchamasdi.
2012-yil 11-fevral kuni nufuzli “Gremmi” mukofotini topshirish arafasida mehmonxonaning yuvinish xonasida 48 yoshli Uitni Xyustonning jasadi topiladi. U buyuk qo‘shiqchi, birinchi darajali yulduz bo‘lib, uning iste’dodi millionlab odamlarga quvonch ulashgan edi.
Uning fojiali o‘limi o‘sha paytda ko‘pchilikni larzaga solgan, ammo faqat Uitnining yaqinlarigina pop-yulduz vafotining asl sababini bilishardi. So‘nggi yillarda Uitni Xyuston doimiy ruhiy bosim ostida yashagan, ovozini yo‘qotgan, asabiylashgan va spirtli ichimliklar hamda taqiqlangan dori vositalariga ruju qo‘ygan.
Eng qimmat klinikalarda davolanish ham, afsuski, vaqtinchalik edi. Yomon odatlarga qarshi kurashdan, ijodiy inqirozdan holdan toygan Uitnining xayoliga tez-tez yuragini xavotirga soladigan tashvishli fikr kelardi: yagona qizi Kristina ham onasining taqdirini takrorlamasmikan?
Shaxsiy hayoti
Yulduzning Bobbi Braun bilan nikohi 14 yil davom etdi, ehtimol, uning o‘limiga ham shu sabab bo‘lgandir. Qanday qilib Uitni Xyuston qo‘pol, iste’dodsiz qo‘shiqchi va qobiliyatsiz aktyor Bobbi Braunni sevib qolgan?
Xonanda Eddi Merfi, Kevin Kostner kabi mashhur aktyorlar bilan rol o‘ynagan, ular mardligi, bir so‘zliligi bilan ajralib turardi. Ammo Bobbi Braun ulardan farqli o‘laroq, bunday fazilatlarga ega emasdi. Aksincha, Uitni Xyustonning fikricha, u qo‘pol va barcha narsani ezib o‘tishga moyil bo‘lgan. Afsuski, u buni juda kech tushunadi.
Qiziga bo‘lgan munosabati
To‘g‘risini aytganda, Uitni Xyuston g‘amxo‘r ona bo‘lmagan, uning shaxsiy hayoti omadsiz eriga bog‘liq bo‘lgan.
Kristinaning xotirasida mashinada bo‘lgan bir voqea abadiy muhrlanib qolgandi: 3 yoshligida onasining quchog‘ida o‘tirganida, ota-onasi o‘rtasida janjal bo‘ladi. Darg’azab otasi haydovchiga mashinani to‘xtatishni buyuradi. Keyin esa xotini va bolasini yo‘lning o‘rtasiga tashlab ketadi.
Krisitinaning qanday muhitda o‘sib ulg‘ayganini tasavvur qilish qiyin emas. U otasidan qo‘rqardi va undan nafratlanardi, onasiga esa rahmi kelardi. Aslida Uitni zaif ayol edi, o‘zini va qizini himoya qilolmasdi.
Haqiqatan ham yoshligidan Kristina ota-onasining hayot tarzini va xulq-atvorini o‘ziga singdirgandi. Mish-mishlarga ko‘ra, aynan Bobbi Braun Uitni Xyustonni spirtli ichimliklar va taqiqlangan dorilarga o‘rgatgan. Bu holatni ko‘rib ulg‘aygan qizi ham onasidan o‘rnak olgan.
Qizining taqdiri
Onasining o‘limidan so‘ng Kristina dunyodagi eng yaqin insonini yo‘qotganini birdaniga tushunadi. Ammo bunday hayotdan qutulib ketolmaydi, u ham onasining yo‘lidan ketadi.
Uitni Xyuston asrab olgan o‘gay akasi Nik Gordonga ko‘ngil qo‘yadi. Ammo Nik unga qo‘l ko‘taradi va Kristinaning bank kartasidagi pullarni o‘g‘irlab ketadi — bularning hammasi qizni xavfli chegara tomon yaqinlashtirardi.
Buvisining nevarasini to‘g‘ri yo‘lga solishga urinishi foyda bermaydi. Kristina qo‘shiqchilik qobiliyatini rivojlantirmay, o‘sha joyning o‘zida unga nuqta qo‘yadi. Unga endi nima bo‘lishing farqi yo‘q edi, go‘yo ongli ravishda o‘limiga yaqinlashardi.
2015-yil 31-yanvarda uni yuvinish xonasida hushsiz holda topishadi. Qiz boshini suvga solgan holda yotgan edi — 3 yil oldin onasi ham aynan shu holatda topilgandi. Kristina komaga tushib, olti oy o‘tgach vafot etadi.
Uitni Xyuston nimadan qo‘rqqan bo‘lsa, qizi aynan o‘shani takrorladi. Bobbi Kristina atigi 22 yoshda edi. Hayoti davomida u doim onasini sog‘inganini va uni kutayotganini aytib kelardi.
Izoh (0)