Ijtimoiy tarmoqlarda “Angren” ko‘mir konida avtoag‘dargich yonib ketgani aks etgan video tarqaldi. Holat yuzasidan “O‘zbekko‘mir” aksiyadorlik jamiyati maʼlumot berdi, biroq ko‘p o‘tmay, xabar tashkilot rasmiy kanalidan o‘chirildi.
Unga ko‘ra, 5-mart kuni soat 10:15 larda “Angren” ko‘mir konida “BelAZ” rusumli avtoag‘dargich tog‘ jinslarini to‘kish vaqtida orqaga sirpanib, ag‘darilib ketgan va alangalanish ro‘y bergan. “O‘zbekko‘mir” aksiyadorlik jamiyati o‘t o‘chiruvchilari voqea joyiga yetib kelgan va yong‘in to‘liq o‘chirilgan.
Hodisa oqibatida og‘ir tan jarohati olgan avtoag‘dargich haydovchisi A.Axmedjanovga korxona tibbiy bo‘lim xodimlari tomonidan birinchi yordam berilgan va shoshilinch ravishda shahar markaziy shifoxonasiga yetkazilgan. Ammo ko‘rsatilgan tibbiy yordamga qaramay, haydovchi kasalxonada vafot etgan.
Hozirda ko‘mir konida ro‘y bergan hodisa yuzasidan huquqni muhofaza qilish idoralari tomonidan surishtiruv ishlari olib borilmoqda. “O‘zbekko‘mir” aksiyadorlik jamiyati rahbariyati marhum A.Axmedjanovning oila aʼzolariga hamdardlik bildirdi. Biroq keyinroq bu haqdagi xabar o‘chirildi.
Izoh (0)