Ijtimoiy tarmoqlarda Surxondaryo viloyatining Boysun tumanidagi “M-25” koni hududida yuzaga kelgan vaziyat bo‘yicha videolar tarqaldi. Holat yuzasidan Energetika vazirligi izoh berdi.
Maʼlum qilinishicha, “M-25” koni hududida kichik hajmda to‘plangan gazni xavfsiz yoqish ishlari olib borilmoqda. Kon hududida hech qanday kutilmagan vaziyatlar kuzatilmagan.
Bugungi kunda 2024-yil sentyabr oyida metan emissiyasi sodir bo‘lgan quduq o‘rnida obyektni konservatsiya qilish bo‘yicha rejalashtirilgan ishlar olib borilmoqda va bu yerda doimiy monitoring yuritilyapti.
604-sonli quduqda tozalash ishlari olib borilayotganda quduqdan olis hududlarda yer yuzasiga yaqin joylashgan bo‘shliqlar va kollektorlardagi mikro yoriqlarda kichik hajmdagi gaz to‘plangan.
Ayni paytda hududda kichik hajmda to‘plangan gazni yoqish orqali zararsizlantirish ishlari olib borilmoqda. Bundan ko‘zlangan maqsad kislotali gazlarning atmosferaga chiqishini oldini olishdan iborat.
“Ushbu jarayon atrof-muhit ifloslanishining oldini olishda standart yondashuv hisoblanadi va xalqaro sanoat xavfsizligi talablariga to‘la javob beradi.
Rejalashtirilgan konservatsiya va profilaktika ishlari mazkur texnologik jarayonning o‘ziga xos xususiyatlarini tushunmaydigan odamlar boshqacha talqin qilishi mumkin bo‘lgan bir qator operatsiyalardan iborat. Bunga holat bo‘yicha tarqalgan videolavha yaxshi misol bo‘la oladi”, deyiladi xabarda.
Boysun konidagi avariya
1-sentyabr kuni soat 15:17 da Surxondaryo viloyati Boysun tumani “Ko‘lqamish” MFY hududida joylashgan “Mustaqillikning 25 yilligi” koniga qarashli 604-son qudug‘ida burg‘ilash ishlari olib borish vaqtida texnologik jarayonning buzilishi oqibatida oltingugurt (vodorod sulfid) gazi chiqishi kuzatildi. Aholi xavfsizligini ta’minlash maqsadida kon yaqinida yashovchi fuqarolar xavfsiz hududga evakuatsiya qilindi. Texnogen ofat asoratlarini bartaraf etish bo‘yicha barcha tegishli vazirlik va tashkilotlarni jalb etgan holda, tezkor shtab tashkil etildi.
15-sentyabr kuni soat 16:50 da sizib chiqish to‘xtatildi. 17-sentyabr kuni esa mazkur konda yana gaz chiqish holati yuz berdi. Yangi avariya oqibatida to‘rt kishi halok bo‘ldi. Ular konda ishlagan pudratchi tashkilot xodimlari bo‘lgan.
Izoh (0)