Angren ko‘mir koni zaxirasi 1 mlrd tonnadan ortiq ekani maʼlum bo‘ldi

“O‘zbekko‘mir” AJga qarashli Angren ko‘mir koni zaxirasi 1 milliard tonnadan ortiq ekani maʼlum bo‘ldi. Bu haqda “O‘zbekko‘mir” AJ bosh geologi Erkin Jo‘rayev OAV vakillari bilan bo‘lgan muloqotda gapirib berdi.

Kecha, 2025-yilning 18-fevral kuni jurnalistlar va blogerlar uchun “O‘zbekko‘mir” AJ hamda Angren ko‘mir koniga press-tur tashkil etildi.

Press-tur jarayonida “O‘zbekko‘mir” AJ rahbariyati respublika ko‘mir sanoati sohasida amalga oshirilayotgan ishlar haqida maʼlumot berdi.

Taʼkidlanishicha, Angren ko‘mir koni 1948-yili ochilgan bo‘lib, o‘tgan davr mobaynida 2 milliard kub metrdan ortiq kon ochish ishlari bajarilib, 200 million tonnadan ortiq ko‘mir qazib olingan.

“O‘zbekko‘mir” AJ bosh geologi Erkin Jo‘rayevning aytishicha, konda ayni paytda qazib olishga tayyor zaxira 1 milliard tonnadan ortiq bo‘lib, yangi konlar va qazilishi reja qilingan konlardagi umumiy zaxira esa 2 milliard tonnaga yetadi.

 

Angren ko‘mir konida yiliga o‘zbekistonliklarning ko‘mirga bo‘lgan ehtiyojining 85 foizini qoplashga yetarli ko‘mir qazib olinadi, deydi masʼul.

Tadbir davomida, shuningdek, mahalliy ko‘mir sifati, xonadon sharoitida ko‘mirni to‘g‘ri saqlash, undan foydalanish qoidalari haqida tavsiyalar berildi. Kon ochish jarayonida ko‘mirdan tashqari soz tuproq, ohaktosh, qizg‘ish, kulrang va ikkilamchi kaolinlar hamda noruda materiallar qazib olinishi, mazkur foydali qazilmalarni to‘plash, saralash, boyitish orqali qurilish materiallari, keramika chinnisozlik sohalari ishlab chiqaruvchilariga yetkazib berish mumkinligi taʼkidlandi.