Niderlandiya Groningen gaz konini butunlay yopishga qaror qildi va mamlakat parlamentining yuqori palatasi tegishli qonun loyihasini qabul qildi. Bu haqda Deutsche Welle xabar berdi.
Avvalroq mamlakat hukumati Groningen provinsiyasida zilzila xavfi tufayli gaz ishlab chiqarishni tiklamaslikka va’da bergan edi.
Groningen gaz koni faoliyati 2023-yil oktyabr oyida to‘xtatilgan, biroq Rossiya—Ukraina urushi bilan bog‘liq “qattiq qish” va “noaniq xalqaro vaziyat tufayli” 11 ta quduq ochiq qolgan. Bloomberg’ga ko‘ra, mazkur konda gaz qazib olishni to‘xtatish qarori Niderlandiya jamiyatida qizg‘in muhokamalarga sabab bo‘lgan.
Konni yopish to‘g‘risidagi qaror mintaqada muntazam ro‘y berayotgan zilzilalar tufayli qabul qilingan. Groningen 2013-yilda tarixidagi eng kuchli zilziladan aziyat chekkaniga qaramay, o‘sha yili gaz qazib olish hajmi qariyb 54 milliard kub metrgacha oshirilgan edi.
2018-yildagi yana bir kuchli zilziladan so‘ng hukumat barcha ishlab chiqarishni to‘xtatishga qaror qilgan. Groningenda gaz ishlab chiqarish 1986-yildan beri 1600 ga yaqin zilzilalarni keltirib chiqargan.
O‘n minglab binolar vayron bo‘lgan, yuz mingga yaqin odam jarohatlangan, — deyiladi parlament hisobotida.
Bu davrda konda 2,3 milliard kub metrga yaqin gaz qazib olingan edi.
Izoh (0)