Qozog‘istonning Qarag‘anda viloyati, Kostenko shaxtasidagi avariyada halok bo‘lgan oxirgi konchining jasadi ham topildi. Shu tariqa qurbonlarning umumiy soni 46 kishiga yetdi. Bu haqda Qozog‘iston Favqulodda vaziyatlar vazirligi rahbari Sirim Sharipxonovga tayanib, Tengrinews xabar berdi.
“Qidiruv-qutqaruv ishlari davomida 45 nafar konchining jasadi va 46-marhumga tegishli ekani taxmin qilinayotgan qoldiqlar topildi. Hozirda 40 kishining shaxsi aniqlangan, olti nafarining esa yo‘q. Ularni aniqlash bo‘yicha zarur ekspertiza o‘tkazilmoqda”, — dedi vazir.
U qurbonlarning shaxsini aniqlash uchun DNK tekshiruvi talab etilishini ta’kidladi.
29-oktyabr kuni kechqurun 45 nafar konchining jasadi topilgandi. Shundan so‘ng Qozog‘iston Favqulodda vaziyatlar vazirligi matbuot xizmati qutqaruvchilar yana bir ishchini qidirishda davom etayotgani haqida xabar berdi.
Eslatib o‘tamiz, Kostenko nomidagi konda 28-oktyabr kuni ertalab metan portlashi sodir bo‘ldi. Voqea paytida konda 252 kishi bo‘lgan, 205 nafar konchi mustaqil ravishda yer yuzasiga chiqqan, ulardan 18 nafari tibbiy yordamga murojaat qilgan. Voqeadan keyin mamlakatda motam e’lon qilindi.
Qozog‘istonda baxtsiz hodisadan so‘ng kon yoki qurilish ishlarini olib borishda xavfsizlik qoidalarini buzish moddasi bo‘yicha sudgacha tergov boshlandi. Voqea holatlariga oydinlik kiritish uchun hukumat komissiyasi tuzildi.
Bundan tashqari, Qozog‘iston prezidenti Qosim-Jo‘mart To‘qayev konga egalik qiluvchi ArcelorMittal Temirtau (AMT) kompaniyasi rahbariyatini almashtirdi.
Izoh (0)