Kuvayt neft korporatsiyasi Fors ko‘rfazidagi Faylak orolidan sharqda yirik Al-Nohat neft koni ochilganini ma’lum qildi. Uning zaxiralari mamlakatdagi uch yillik qazib olish hajmiga teng. Bu haqda korporatsiya bosh direktori shayx Navaf Saud al-Saboh xabar berdi.
Konda taxminan 2,1 milliard barrel neft va 5,1 trillion kub fut gaz bo‘lishi mumkin, bu taxminan 3,2 milliard barrel neft ekvivalentiga to‘g‘ri keladi. Kuvayt dunyodagi eng katta neft zaxiralaridan biriga ega. Neft eksport qiluvchi mamlakatlar tashkiloti (OPEK) ma’lumotlariga ko‘ra, 2022-yil oxirida u ushbu ko‘rsatkich bo‘yicha dunyoda 6-o‘rinni egallagan va mamlakatning umumiy neft zaxirasi 100 milliard barreldan ortiq yoki butun jahon zaxirasining 6,5 foizini tashkil etgan.
Al-Nohat konining ochilishi mamlakatning jahon neft bozoridagi yetakchi o‘yinchilardan biri sifatidagi mavqeini yanada mustahkamlaydi. Bu Kuvayt iqtisodiyoti uchun muhim ahamiyatga ega, mamlakat global energetika sohasida o‘z ta’sirini kuchaytirishi va iqtisodiy barqarorligini yaxshilashi mumkin.
Izoh (0)