Qozog‘iston bosh vaziri o‘rinbosari Tamara Duysenova Kostenko konida halok bo‘lgan konchilarning maoshini ma’lum qildi. Bu haqda Tengrinews xabar berdi.
“Raqamli oila kartasi bo‘yicha ularning maoshlari haqidagi maʼlumotlarni ko‘rib chiqdik. 300 mingdan 1,6 million tengegacha (639 dollardan taxminan 3 400 dollardan ortiq), chunki ular orasida yosh ishchilar, endigina ishga kelganlar ham bo‘lgan. Shuning uchun konchilar malakasi va funksionalligiga qarab maoshlarda farq bor”, — dedi Duysenova.
U konchilarning ish haqini oshirish masalasi har yili ko‘rib chiqilishini ta’kidladi.
“Ularning kollektiv shartnomasida ish hajmini bajarish uchun tegishli qo‘shimcha to‘lovlar nazarda tutilgan. O‘tgan yillarda bu inflyatsiya darajasida, keyin esa ishlab chiqarish hajmlari nuqtayi nazaridan ko‘rib chiqildi”, — deydi bosh vazir o‘rinbosari.
Qarag‘anda konidagi portlash
28-oktabr kuni Qarag‘anda viloyatidagi Kostenko konida portlash sodir bo‘ldi. Oqibatda 46 nafar konchi halok bo‘ldi. Voqea paytida konda 252 kishi bo‘lgan, 205 nafar konchi mustaqil ravishda yer yuzasiga chiqqan, ulardan 18 nafari tibbiy yordamga murojaat qilgan. Voqeadan keyin mamlakatda motam e’lon qilindi.
Qozog‘istonda baxtsiz hodisadan so‘ng kon yoki qurilish ishlarini olib borishda xavfsizlik qoidalarini buzish moddasi bo‘yicha sudgacha tergov boshlangan. Voqea holatlariga oydinlik kiritish uchun hukumat komissiyasi tuzilgan.
Bundan tashqari, Qozog‘iston prezidenti Qosim-Jo‘mart To‘qayev konga egalik qiluvchi ArcelorMittal Temirtau (AMT) kompaniyasi rahbariyatini almashtirgan.
Izoh (0)