“Boysundagi avariya oqibatlarini bartaraf etish juda qisqa vaqt ichida amalga oshirildi” — Jo‘rabek Mirzamahmudov

Energetika vaziri Jo‘rabek Mirzamahmudov “Lolazor” podkastida Boysundagi falokat ko‘lami haqida batafsil ma’lumot berdi. U bunday yirik texnogen hodisalar olti marta bo‘lgani, Boysundagi avariya esa rekord darajada tez bartaraf etilganini aytdi.

Boysundagi falokat O‘zbekiston tarixidagi eng yirik oltinchi texnogen halokatdan biri edi. Biroq uning oqibatlarini bartaraf etish juda qisqa vaqt ichida amalga oshirildi. Qiyinchilik shunda ediki, falokat joyida vodorod sulfidning yuqori miqdori aniqlandi, bu esa ishni sezilarli darajada murakkablashtirdi. Bu gaz uskunalarni yemirdi va takroriy sizib chiqishlarga olib keldi. Shunga qaramay, mutaxassislarimiz tiqinni o‘rnatishga va sizib chiqishni vaqtincha to‘xtatishga muvaffaq bo‘ldi, deya tushuntirdi vazir.

Mirzamahmudov hodisa joyiga xalqaro ekspertlar jalb qilingani, bu vaziyatga tezkor choralar ko‘rish imkonini berganini ta’kidladi.

Ozarbayjon va AQSHdan mutaxassislarni taklif qildik, ular oqibatlarni bartaraf etishga yordam berdi. Bu O‘zbekiston tarixidagi eng tez bartaraf etilgan falokatlardan biri bo‘ldi, dedi u.

Ta’kidlanishicha, asosiy muammolardan biri quduqdagi yuqori gaz bosimi, murakkab tarkib va vodorod sulfid bo‘lib, bu alohida xavfsizlik choralarini talab qilgan. U falokat stansiyaning yopilishiga olib kelmaganini aytdi.

Barcha qiyinchiliklarga qaramay, Boysundagi stansiya yopilmadi. Ishlar davom etmoqda va biz xavfsizlikni ta’minlash hamda keyingi sizib chiqishlarning oldini olish uchun barcha choralarni ko‘rmoqdamiz, ta’kidladi Mirzamahmudov.

Shuningdek, u ilg‘or texnologiyalardan va barcha xavfsizlik choralariga rioya qilgan holda tugallash ishlari davom etayotganini aytdi. Murakkab sharoit va yuqori xavf-xatarlar doimiy nazoratni talab etayotgani, ishlar yaqin kunlarda yakunlanishi ta’kidlandi.

Boysun konidagi avariya

• 1-sentyabr kuni soat 15:17 da Surxondaryo viloyati Boysun tumani “Ko‘lqamish”  MFY hududida joylashgan “Mustaqillikning 25 yilligi” koniga qarashli 604-son qudug‘ida burg‘ilash ishlari olib borish vaqtida texnologik jarayonning buzilishi oqibatida oltingugurt (vodorod sulfid) gazi chiqishi kuzatilgan.
• Aholi xavfsizligini ta’minlash maqsadida kon yaqinida yashovchi fuqarolar xavfsiz hududga evakuatsiya qilingan. Prezident topshirig‘iga asosan bosh vazir o‘rinbosari Ochilboy Ramatov, Favqulodda vaziyatlar vaziri Abdulla Qo‘ldoshev, energetika vaziri Jo‘rabek Mirzamahmudov, Surxondaryo viloyati hokimi Ulug‘bek Qosimov hamda “O‘zbekneftgaz” boshqaruv raisi Bahodir Siddiqov hodisa joyiga yetib borgan.
• 15-sentyabr kuni soat 16:50 da sizib chiqish to‘xtatilgan. Ammo mazkur konda 17-sentyabr kuni yana gaz chiqish holati yuz bergan. Yangi avariya oqibatida to‘rt kishi halok bo‘lgan.