Surxondaryo viloyati hokimligi Boysundagi kon portlatilishi haqidagi xabarlarni rad etdi.
Ijtmoiy tarmoqlarda “M-25” konida gaz chiqishini to‘xtatish maqsadida yengil portlatish ishlari amalga oshirilishi haqida xabarlar tarqalgandi. Viloyat hokimligi bu yolg‘on ekanini bildirdi.
“Mazkur xabar asossiz bo‘lib, hozirda bunday choralarni amalga oshirish rejalashtirilmagani ma’lum qilanadi hamda bu kabi yolg‘on xabarlarga ishonmaslikni va tarqatmaslikni so‘raymiz”, deyiladi hokimlik bayonotida.
Surxondaryo viloyati hokimligi aholi o‘rtasida vahima uyg‘otuvchi yolg‘on va asossiz xabarlarni tarqatganlik uchun qonunchilikda javobgarlik belgilanganini ham eslatib o‘tdi.
Boysun konidagi avariya
1-sentyabr kuni soat 15:17 da Surxondaryo viloyati Boysun tumani “Ko‘lqamish” MFY hududida joylashgan “Mustaqillikning 25 yilligi” koniga qarashli 604-son qudug‘ida burg‘ilash ishlari olib borish vaqtida texnologik jarayonning buzilishi oqibatida oltingugurt (vodorod sulfid) gazi chiqishi kuzatildi. Aholi xavfsizligini ta’minlash maqsadida kon yaqinida yashovchi fuqarolar xavfsiz hududga evakuatsiya qilindi. Texnogen ofat asoratlarini bartaraf etish bo‘yicha barcha tegishli vazirlik va tashkilotlarni jalb etgan holda, tezkor shtab tashkil etildi.
15-sentyabr kuni soat 16:50 da sizib chiqish to‘xtatildi. 17-sentyabr kuni esa mazkur konda yana gaz chiqish holati yuz berdi. Yangi avariya oqibatida to‘rt kishi halok bo‘ldi. Ular konda ishlagan pudratchi tashkilot xodimlari bo‘lgan.
Izoh (0)