Qozog‘istonning Mang‘istov viloyatida atmosferaga yirik miqdorda metan sizdirgani uchun “Buzachi Neft” kompaniyasi 780 ming dollar jarimaga tortildi. Bu haqda “TASS” xabar berdi.
Ma’lum qilinishicha, o‘zlashtirilayotgan “Qoraturun” konida sodir bo‘lgan yong‘in oqibatida katta miqdorda metan sizib chiqqan. Yong‘inni 200 kun davomida o‘chirishning iloji bo‘lmagan. Konda o‘tkazilgan rejadan tashqari tekshiruv davomida atmosferada havoni ifloslantiruvchi moddalarning ruxsat etilgan maksimal konsentratsiyasidan oshib ketgani aniqlangan: metan bo‘yicha – 480 baravarga, neft mahsulotlari uchun tuproqda – 168,13 mg/kg.
“To‘rtta ma’muriy bayonnoma tuzildi. Dastlabki hisob-kitoblarga ko‘ra, jarima miqdori 350 million tengedan (taxminan 780 ming dollar) oshadi”, — deyiladi xabarda.
Shuningdek, kompaniya atrof-muhitga yetkazilgan zararni bartaraf etish bo‘yicha dastur ishlab chiqishi zarur.
Avvaliga Qozog‘istonning g‘arbiy qismidagi “Qoraturun Yujniy” qudug‘ini o‘zlashtirayotgan “Buzachi Neft” shirkati katta miqdorda metan sizib chiqishini inkor etib, sanitariya muhofazasi zonasida ifloslantiruvchi moddalar konsentratsiyasi maqbul darajadan oshmasligini ta’kidlagandi.
Yong‘in 2023-yil 9-iyun kuni quduqni burg‘ilash vaqtida boshlangan. Yong‘in alangasi balandligi 10 metrga yetgan. Dekabr oyi oxirida yong‘in o‘chirilgan, buning uchun mutaxassislar avariya quduqlarini burg‘ilagan.
Izoh (0)