АҚШ Давлат самарадорлиги департаменти (DOGE) раҳбари, америкалик тадбиркор Илон Маск супер миллиардерлар рейтингида биринчи ўринни эгаллади, деб ёзади The Wall Street Journal Altrata компаниясининг эксклюзив рейтингига таяниб.
24 та позицияни ўз ичига олган рейтингга кўра, 2025 йил февраль ҳолати бўйича бойлиги 419,4 миллиард долларга баҳоланган Маск дунёдаги энг бой одам ҳисобланади.
Ундан ташқари рейтингга Американинг Амазон онлайн-ритейлери асосчиси Жефф Безос (263,8 миллиард доллар), Франциянинг ҳашаматли буюмлар ишлаб чиқарувчи LVMH эгаси Бернар Арно (238,9 миллиард доллар), Американинг Oracle Corporation дастурий таъминот ишлаб чиқарувчиси асосчиларидан бири Ларри Эллисон (237 миллиард доллар) ва Меtа корпорацияси раҳбари Марк Цукерберг (220,8 миллиард доллар) киритилган.
Рейтингда олтинчи ўринни 160,5 миллиард доллар бойлиги билан Google ҳаммуассиси Сергей Брин эгаллаган.
Wall Street Journal’нинг аниқлик киритишича, дунёдаги энг бой 24 нафар кишининг умумий бойлиги 3,3 триллион долларни ташкил қилади. Улардан 16 нафарининг бойлиги 100 миллиард доллардан ошади.
Меросхўрлар эмас, балки ўз кучи билан миллиардерга айланган шахслар
Тадқиқотчиларнинг таъкидлашича, бугунги миллиардерлар элитаси ўтмишдаги энг бой инсонлардан сезиларли даражада фарқ қилади. 19-аср ва 20-аср бошларида капиталлари моддий инфратузилмага асосланган саноатчилар ўта бойиб кетган. Масалан, Жон Рокфеллер нефтни, Эндрю Карнеги пўлатни, Корнелиус Вандербилт эса темир йўлларни назорат қилган.
Бугунги кунда номоддий активлар, интеллектуал мулк ва келажакдаги ўсиш имкониятлари ҳал қилувчи аҳамиятга эга. Ўн йиллар давомида бойиб кетган эски капиталистлардан фарқли ўлароқ, замонавий супер миллиардерлар ўз бойликларини бир неча йил ичида яратмоқдалар. Технология соҳасидаги миллиардерларнинг бойлиги кўп жиҳатдан бозор тебранишларига боғлиқ. Масалан, Женсен Хуангнинг бойлиги бир йил ичида Nvidia акцияларининг ўсиши туфайли ўнлаб миллиард долларга кўпайди.
Шунингдек, ўтган асрдан фарқли ўлароқ, дунёнинг энг бой одамлари энди меросхўрлар эмас, балки тадбиркорлардир.
Heritage Foundation тадқиқотига кўра, 2005 йилда Forbes 400 рўйхатига киритилган ва ўз бойлигини мерос қилиб олган 97 нафар миллиардернинг ярмидан кам қисми ҳозирги рейтингда сақланиб қолган.
Изоҳ (0)