Dunyoning eng boy odami Ilon Mask unga tegishli elektromobil ishlab chiqaruvchi Tesla kompaniyasi aksiyalari narxining ikki kunlik pasayishi fonida 50 milliard dollar yo‘qotdi. Bu haqda Bloomberg xabar berdi.
Tesla qimmatli qog‘ozlarining narxi Mask Twitter’da so‘rovnoma o‘tkazganidan keyin tusha boshladi. Milliarder o‘z obunachilaridan kompaniya aksiyalarining 10 foizini sotishi kerakmi yoki yo‘qligini so‘ragan va har qanday holatda ovoz berish natijalariga rioya qilishga va’da bergan. Respondentlarning deyarli 58 foizi aksiyalarni sotish uchun ovoz bergan.
Bundan tashqari, aksiyalar narxining pasayishiga tadbirkorning ukasi Kimbal Maskning Tesla qimmatli qog‘ozlaridagi o‘z ulushini 100 million dollardan ko‘proqqa sotgani haqidagi xabarlar hamda Ilon Maskning o‘zi ham shaxsiy qarzlarini qoplash uchun ulushini sotmoqchiligi haqidagi mish-mishlar ta’sir ko‘rsatdi.
Ilon Maskning yo‘qotishlari Bloomberg Billionaires Index tarixida boylikning ikki kunlik eng yirik pasayishi bo‘ldi. Indeksga ko‘ra, hozir Tesla asoschisining boyligi 288 milliard dollarga yetadi. Forbes Real Time Maskning boyligini 271 milliard dollarga baholamoqda. Noyabr oyi boshida bu miqdor 300 milliard dollardan oshgandi.
Bloomberg ta’kidlashicha, Mask hamon dunyodagi eng boy odam bo‘lib qolmoqda, biroq u va milliarderlar ro‘yxatida ikkinchi o‘rinda turgan Amazon asoschisi Jeff Bezos o‘rtasidagi tafovut 83 milliard dollargacha qisqargan.
Izoh (0)