Kreml Yevropaning Ukrainada o‘z harbiylarini joylashtirish rejalari haqidagi barcha xabarlarni diqqat bilan kuzatmoqda va ular xavotir uyg‘otmoqda. Bu haqda Rossiya prezidenti matbuot kotibi Dmitriy Peskov brifingda ma’lum qildi.
Peskov, shuningdek, bu boradagi bayonotlar ba’zan bir-biriga zid ekanini ta’kidladi.
Avvalroq Britaniyaning The Daily Telegraph nashri G‘arb rasmiylariga tayanib, Ukrainaning Yevropadagi ittifoqchilari Vashingtonga u yerga Yevropa davlatlaridan qariyb 30 ming nafar harbiyni joylashtirishni taklif qilmoqchi ekani haqida xabar bergan edi.
Biz bu xabarlarning barchasini, shuningdek, yevropaliklarning bu boradagi ba’zan bir-biriga zid bo‘lgan rasmiy bayonotlarini diqqat bilan kuzatib boramiz. Bu bizni xavotirga solmoqda, chunki gap harbiy kontingentlarni yo‘naltirish, NATO mamlakatlari harbiy kontingentlarining Ukrainadagi ehtimoliy ehtimoliy yo‘nalishi haqida ketmoqda. Bu bizning xavfsizligimiz nuqtai nazaridan butunlay boshqacha ahamiyat kasb etadi. Shu sababli ushbu mavzu biz uchun muhim, dedi Kreml vakili.
Peskov NATO mamlakatlari harbiy kontingentlarining Ukraina hududida joylashtirilishi Rossiya uchun maqbul emasligini qo‘shimcha qildi. Siyosatchi bu haqda avvalroq Rossiya tashqi ishlar vaziri Sergey Lavrov ham gapirganini eslatdi.
The Daily Telegraph xabariga ko‘ra, ishlab chiqilgan takliflarni AQSH prezidenti Donald Trampga kelasi hafta Vashingtonda Buyuk Britaniya bosh vaziri Kir Starmer taqdim etadi.
Buyuk Britaniya va Fransiya taklif qilayotgan reja G‘arb harbiylari Ukrainaning eng yirik shaharlarida, jumladan Poltava, Dnepropetrovsk va Krivoy Rogda, asosiy portlarda va mamlakat uchun muhim infratuzilma obyektlarida, jumladan, AESda joylashtirilishini nazarda tutadi.
Bu esa Rossiya va NATO davlatlari harbiylari o‘rtasidagi to‘g‘ridan-to‘g‘ri qarama-qarshilik xavfini kamaytiradi. Kontingent texnik kuzatuv vositalaridan, jumladan, sun’iy yo‘ldoshlar, dronlar va razvedka samolyotlaridan, rejaga ko‘ra, ukrainalik harbiylar bo‘ladigan to‘qnashuv chizig‘idagi vaziyatni kuzatish uchun keng foydalanadi, deyiladi nashr xabarida.
Avvalroq Starmer mojaroni hal qilish uchun Kiyev rasmiylariga xavfsizlik kafolati sifatida Ukrainaga qo‘shin yuborishga tayyorligini ma’lum qilgandi. Biroq, u Yevropa harbiylarini mamlakatga joylashtirish sharti sifatida AQSH kafolatini ko‘rsatgan. Uning so‘zlariga ko‘ra, ularsiz “Rossiyani tiyib turish” bo‘yicha har qanday choralar samarali bo‘lmaydi.
Izoh (0)