Xitoy tashqi ishlar vaziri Van I Myunxen xavfsizlik konferensiyasi ochilishida so‘zga chiqdi. Diplomat o‘z mamlakatining ko‘p qutbli dunyoga sodiqligini ta’kidladi.
Xitoy uchun yevropaliklar hamkor, raqib emas. Va bu bizning ko‘p qutbli dunyomizda juda muhim siyosatdir, dedi u.
Bundan tashqari, Van I AQSH hukumatini Xitoyni tiyishga urinishdan ogohlantirdi. XXR vakilining so‘zlariga ko‘ra, bu Pekinning qat’iy chora-tadbirlariga sabab bo‘ladi.
Van I, shuningdek, Rossiya va Ukraina o‘rtasidagi ehtimoliy sulh muzokaralariga izoh berdi.
Pekin Ukraina mojarosini hal qilishga yordam beradigan barcha sa’y-harakatlarni, jumladan, so‘nggi kunlarda AQSHning Rossiya bilan kelishuvga erishganini olqishlaydi. Barcha tomonlar munosib vaqtda Ukraina bo‘yicha tinchlik muzokaralarida ishtirok etishi lozim, deya qo‘shimcha qildi diplomat.
U Xitoyning Rossiya gazidan voz kechishga tayyor emasligini ta’kidladi, chunki boshqa davlatlar XXR talab qilgan miqdordagi resurslarni yetkazib bera olmaydi.
Aksar davlatlar Xitoyga bosim o‘tkazish uchun iqtisodiy va savdo masalalarini siyosiylashtirmoqda. Biz bunga yo‘l qo‘ya olmaymiz, deb xulosa qildi Van I.
Xavfsizlik bo‘yicha Myunxen konferensiyasi 1963-yildan beri o‘tkazib kelinmoqda, dastlab u NATO vakillarining uchrashuvi sifatida tashkil etilgan edi. 1990-yillarning oxirida Sharqiy Yevropa mamlakatlari, shuningdek, Xitoy va Hindiston ham ishtirok etishga taklif qilina boshlandi.
“Rossiya va Xitoy Yevropa uchun asosiy tahdid emas” — AQSH vitse-prezidenti
Ushbu konferensiyada ishtirok etgan Amerika vitse-prezidenti J.D.Vens AQSH Rossiya va Xitoy tomonidan qit’aga bo‘layotgan tahdiddan ko‘ra, Yevropaning “ichkarisidan kelayotgan xavf”dan ko‘proq xavotirda ekanini aytdi.
Yevropaga nisbatan meni eng ko‘p tashvishga solayotgan tahdid bu Rossiya yoki Xitoy emas. Men ichkaridan kelayotgan tahdid — Yevropaning eng asosiy qadriyatlaridan chekinishidan xavotirdaman, dedi Vens.
Vitse-prezident Ruminiyada Rossiya aralashuvi bahonasida konstitutsiyaviy saylovlar bekor qilinganini misol qilib keltirdi. Shuningdek, u Yevropa davlatlarida senzura va migratsiya siyosatini tanqid qildi.
Bugun Yevropaga qaraganimda, “Sovuq urush” g‘oliblarining ba’zilari qanday ahvolga kelib qolganini ko‘rib hayron bo‘laman, deya xulosa qildi Vens.
Izoh (0)