AQSH mudofaa vaziri Pit Xegset Ukrainaga yadroviy qurol berilishi mumkinligini ma’lum qildi. Bu haqda u Breitbart News bilan suhbatda ma’lum qildi.
Xegsetning so‘zlariga ko‘ra, bunday qurolni berish AQSH prezidenti Donald Trampning qaroriga bog‘liq.
Bu mening vazifam emas. Bu prezidentning ishi. U rahbar, muzokara olib borish va kelishuvlar tuzish ustasi, degan Pentagon rahbari.
U vazifasi tinchlik kelishuvi ehtimolini oshirishi uchun ma’lum shartlarni belgilashga ko‘maklashish ekanini qo‘shimcha qildi.
Ukraina prezidenti Vladimir Zelenskiy tinchlik kelishuvi doirasida Rossiyaning kelajakdagi bosqinidan himoyalanish uchun Ukrainaga NATO a’zoligi yoki yadroviy qurol berilishi lozimligini aytgandi.
Bizga yadro qurollarini qaytaring va Rossiyani to‘xtata oladigan miqdorda raketalar bering, degan u britaniyalik teleboshlovchi Pirs Morgan bilan intervyuda.
Pentagon rahbari bunga javoban, Ukraina tegishli bayonotni “qizil chiziqlar"dan kelib chiqib emas, balki “real holat”ni hisobga olib berish kerakligini aytgan.
Biz hozirgi vaziyatni hisobga olsak, NATOga a’zo bo‘lish ehtimoli past. Agar muzokaralar yo‘li bilan tinchlikka erishmoqchi bo‘lsak, agar siz (Ukraina) o‘t ochishni to‘xtatishni va uzoq muddatli tinchlik uchun imkoniyatlarni xohlasangiz, hozirgi vaqtda bu rejalarda yo‘q. 2014-yilgi chegaralarga qaytish ham hozir rejalarda ko‘zda tutilmagan, dedi Xegset.
AQSHning yangi mudofaa vaziri Pit Xegset Bryusselda bo‘lib o‘tgan Ramshtayn formatidagi yig‘ilishda so‘zga chiqib, Ukrainaning 1991-yilgi chegaralarini qaytarish real maqsad emasligini ta’kidlagan. U Ukrainaning NATOga kirishi urushni tinch yo‘l bilan hal qilishga yordam bermasligini aytgan. Tramp esa urushni diplomatik yo‘l bilan yakunlamoqchi ekanini ta’kidlagan.
Xegset, shuningdek, AQSH har qanday holatda ham Ukrainaga o‘z qo‘shinlarini yubormasligini ma’lum qilgan.
Ayni paytda Estoniya xalqaro hamkorlar bilan birgalikda urushdan keyingi tinchlikparvarlik missiyasi doirasida o‘z harbiylarini Ukrainaga yuborishga tayyor ekanini bildirgan.
Izoh (0)