O‘zbekistonning Istanbuldagi Bosh konsulxonasi ushbu mamlakatda bo‘lib turgan fuqarolarni turli noqonuniy va’da va tavsiyalarga ishonmaslikka chaqirdi.
Ma’lum qilinishicha, so‘nggi paytlarda ayrim jinoiy guruhlar O‘zbekiston fuqarolariga katta pul mukofoti va’da qilib, ularni Yevropa Ittifoqiga, asosan Gretsiyaga noqonuniy muhojirlarni dengiz orqali o‘tkazishda vositachi sifatida ishlatishga harakat qilmoqda.
Hozirda bunday noqonuniy faoliyatga jalb qilingan fuqarolar Turkiya qonunchiligiga ko‘ra jinoiy javobgarlikka tortilmoqda va uzoq muddatga ozodlikdan mahrum etilmoqda.
Noqonuniy migratsiyaga ko‘maklashishning oqibatlari:
- 10 yilgacha ozodlikdan mahrum etish jazosi;
- og‘ir jarimalar va deportatsiya;
- Turkiyada doimiy yashash va ishlash huquqidan mahrum bo‘lish;
- Turkiya va Yevropa mamlakatlariga kirish taqiqlari.
O‘zbekiston Respublikasining Istanbuldagi Bosh konsulxonasi fuqarolardan turli noqonuniy va’da va tavsiyalarga ishonmaslikni qat’iy tavsiya qiladi.
“Firibgarlarning va’dalariga uchmang va o‘zingizni hamda yaqinlaringizni muammolardan asrang”, deyiladi Bosh konsulxona xabarida.
Avvalroq Bosh konsulxona 1-fevraldan Turkiyaga shartli kirish (şartlı giriş) tartibi bekor qilinganini e’lon qilgandi. Qonuniy qolish muddati tugagan yoki yashash guvohnomasi (ikamet izni) olish rad etilgan fuqarolarni ushbu mamlakat qonunini hurmat qilgan holda tark etishni so‘radi. Chunki bu turdagi qoidabuzarliklar Turkiyaga qaytish imkoniyatining cheklab qo‘yilishiga sabab bo‘lishi mumkin.
Izoh (0)