Turkiyada jinoyat sodir qilib, 3 yildan beri qidiruvda bo‘lgan o‘zbekistonlik ayol mamlakatga deportatsiya qilindi. Bu haqda O‘zbekistonning Istanbuldagi Bosh konsulxonasi xabar berdi.
Unga ko‘ra, Turkiya va O‘zbekiston Ichki ishlar vazirliklari hamkorligida o‘tkazilgan tezkor tadbir davomida joriy yilda Istanbul shahrida qo‘lga olingan, firibgarlik jinoyatlarini sodir etganlikda ayblanib, 2021-yildan buyon qidiruvda bo‘lgan Rahmatova Shohista bugun Bosh konsulxona xodimlari ishtirokida O‘zbekistonga deportatsiya qilindi.
Ushbu shaxsning xatti-harakatlaridan jabr ko‘rgan fuqarolardan O‘zbekistonning Istanbul shahridagi Bosh konsulxonasiga yoki O‘zbekiston Ichki ishlar vazirligi yoxud uning quyi tizimlariga murojaat qilish so‘raldi.
Ta’kidlanishicha, jinoiy javobgarlikdan qochib, xorijiy davlatlarda, shu jumladan, Turkiyada yashirinib yurgan har bir shaxsga nisbatan jinoiy ta’qib izchil ravishda davom ettiriladi va jinoyat uchun javobgarlik prinsipi qat’iy ta’minlanadi.
Shu bilan birga, keyingi vaqtlarda ko‘plab firibgarlik holatlari yuzasidan Bosh konsulxonaga kelayotgan murojaatlar soni ortganini inobatga olib, fuqarolardan firibgarlardan ogoh bo‘lish so‘raldi.
Bundan avval Turkiyaga chiqib ketgan o‘zbekistonlik yigit bedarak yo‘qolgani xabar qilingandi. Shuningdek, Turkiyada 4 yildan buyon tutqunlikda saqlab kelingan o‘zbekistonlik ayol qutqarilgani haqida xabar berilgandi. Tashqi ishlar vazirligi orqali Qarshi shahridan 21 yoshli fuqaro o‘z onasining Istanbulga 4 yil oldin ketgani, 3 yildan beri aloqaga chiqmayotganini aytib, onasini topish va vatanga qaytarishda yordam so‘ragan. Turkiya qonunchiligiga binoan shaxsni erkiga xilof ravishda tutqunlikda saqlagani uchun turkiyalikka nisbatan jinoyat ishi qo‘zg‘atildi.
Izoh (0)