Ўзбекистоннинг Истанбулдаги Бош консулхонаси ушбу мамлакатда бўлиб турган фуқароларни турли ноқонуний ваъда ва тавсияларга ишонмасликка чақирди.
Маълум қилинишича, сўнгги пайтларда айрим жиноий гуруҳлар Ўзбекистон фуқароларига катта пул мукофоти ваъда қилиб, уларни Европа Иттифоқига, асосан Грецияга ноқонуний муҳожирларни денгиз орқали ўтказишда воситачи сифатида ишлатишга ҳаракат қилмоқда.
Ҳозирда бундай ноқонуний фаолиятга жалб қилинган фуқаролар Туркия қонунчилигига кўра жиноий жавобгарликка тортилмоқда ва узоқ муддатга озодликдан маҳрум этилмоқда.
Ноқонуний миграцияга кўмаклашишнинг оқибатлари:
- 10 йилгача озодликдан маҳрум этиш жазоси;
- оғир жарималар ва депортация;
- Туркияда доимий яшаш ва ишлаш ҳуқуқидан маҳрум бўлиш;
- Туркия ва Европа мамлакатларига кириш тақиқлари.
Ўзбекистон Республикасининг Истанбулдаги Бош консулхонаси фуқаролардан турли ноқонуний ваъда ва тавсияларга ишонмасликни қатъий тавсия қилади.
“Фирибгарларнинг ваъдаларига учманг ва ўзингизни ҳамда яқинларингизни муаммолардан асранг”, дейилади Бош консулхона хабарида.
Аввалроқ Бош консулхона 1 февралдан Туркияга шартли кириш (şартлı гириş) тартиби бекор қилинганини эълон қилганди. Қонуний қолиш муддати тугаган ёки яшаш гувоҳномаси (икамет изни) олиш рад этилган фуқароларни ушбу мамлакат қонунини ҳурмат қилган ҳолда тарк этишни сўради. Чунки бу турдаги қоидабузарликлар Туркияга қайтиш имкониятининг чеклаб қўйилишига сабаб бўлиши мумкин.
Изоҳ (0)