Global internet foydalanuvchilari soni 5,56 milliard kishini tashkil etmoqda. Ularning aksariyati internetga kirish uchun telefondan foydalanadi. Ijtimoiy tarmoqlardan foydalanishda ayollar yetakchilik qilmoqda. Digital 2025 global hisobotida statistika taqdim etildi.
Dunyo bo‘ylab ijtimoiy tarmoqlardan foydalanish keskin oshmoqda. Hozirda 5,24 milliard kishi ijtimoiy tarmoqlardan faol foydalanadi. Ularning umumiy soni so‘nggi 12 oy ichida 4,1 foizga oshgan. So‘nggi tadqiqotlariga ko‘ra, “do‘stlar va oila bilan aloqada bo‘lish” ijtimoiy tarmoqlardan foydalanishning asosiy sababi hisoblanadi.
Global miqyosda “bo‘sh vaqtda band bo‘lish” ikkinchi o‘rinda turadi. Bu esa ijtimoiy tarmoq ilovalarida “cheksiz lentalar” nega keng tarqalganini tushunishga yordam beradi. Har uch nafar foydalanuvchidan biri “yangiliklarni o‘qish” uchun ijtimoiy platformalarni afzal ko‘radi.
“Do‘stlar va oila bilan aloqada bo‘lish” barcha yosh guruhlari uchun eng yuqori ijtimoiy motivatsiya hisoblanadi. Foydalanuvchilar ko‘proq “trendga aylangan mavzular”dan xabardor bo‘lishga qiziqish bildirsa, katta yoshlilar yangiliklarni o‘qishga ko‘proq e’tibor qaratadi. Yosh bo‘yicha odamlar ko‘proq kimlarga obuna bo‘lishi quyida keltirib o‘tilgan:
Odamlar yangiliklarni ko‘pincha Facebook’dan o‘qimoqda
Dunyo bo‘ylab yangiliklarni o‘qish uchun Facebook’dan foydalanish yuqori bo‘lib qolmoqda. Respondentlarning 37 foizi yangiliklar uchun aynan undan foydalanishini aytgan. Katta yoshli faol Facebook foydalanuvchilarining 57,3 foizi yangiliklar va dolzarb voqealardan xabardor bo‘lish uchun platformaga kiradi.
Bu ko‘rsatkich yoshga qarab o‘zgarsa-da, 16 yoshdan 24 yoshgacha bo‘lgan Facebook faol foydalanuvchilarining yarmidan ko‘pi hali ham platformadan yangiliklar va dolzarb voqealardan xabardor bo‘lish uchun foydalanadi.
Erkaklar ayollarga qaraganda ijtimoiy tarmoqlardan yangiliklar uchun ko‘proq foydalanadilar, garchi bu “gender tafovuti” nisbatan kichik bo‘lsa ham.
Iqtisodiy rivojlanish ko‘rsatkichi past davlatlarda odamlar yangiliklarni o‘qish uchun ko‘proq ijtimoiy tarmoqlarga yuzlanadi. Nigeriyada faol ijtimoiy tarmoq foydalanuvchilarining 56,6 foizi joriy voqealarni kuzatishni afzal biladi. Xuddi shunday, Braziliya, Turkiya va Gretsiyadagi katta yoshli foydalanuvchilarning yarmidan ko‘pi bunga qo‘shiladi.
Yaqin Sharqdagi foydalanuvchilar ijtimoiy tarmoqlarda yangiliklar kontentini izlashga kamroq moyil.
Ayollar ijtimoiy tarmoqlardan ko‘proq foydalanadi
Ayollar barcha yoshdagi erkaklarga qaraganda ijtimoiy tarmoqlarda ko‘proq vaqt o‘tkazishda davom etmoqda.16 yoshdan 24 yoshgacha bo‘lgan qizlar kuniga o‘rtacha 3 soatdan sal kamroq vaqtni ijtimoiy tarmoqlardan foydalanishga sarflaydi. Hozirgi ko‘rsatkich ikki yil oldin shu guruh uchun qayd etilgan o‘rtacha ko‘rsatkichdan 12 daqiqaga past.
Xuddi shu yosh guruhidagi erkaklar ham so‘nggi ikki yil ichida kunlik faollikni 12 daqiqaga qisqartirgan, ya’ni yosh foydalanuvchilar orasidagi “gender tafovuti” 25 daqiqa bo‘lib qolmoqda.
Biroq, boshqa tomonda, 55 yoshdan 64 yoshgacha bo‘lgan ayollar bugungi kunda ijtimoiy tarmoqlardan ikki yil oldingiga qaraganda ko‘proq foydalanadi. So‘nggi 24 oy ichida ushbu guruhning kundalik faolligi 6 daqiqa oshgan, ammo shu davrda xuddi shu yosh guruhidagi erkaklar o‘rtacha 4 daqiqaga kamaygan.
Foydalanuvchilar bo‘yicha top-platformalar
2025-yil boshida YouTube eng ko‘p foydalanilgan ijtimoiy media platformasi hisoblanadi. Undan keyingi o‘rinni Whatsapp egallagan. Facebook uchinchi, Instagram esa to‘rtinchi o‘rinda. TikTok platformasi esa kuchli beshlikni yakunlaydi.
Biroq foydalanuvchilar sevimli platforma sifatida Instagram’ni tanlamoqda. Dunyo miqyosida WhatsApp 16 foiz bilan ikkinchi, Facebook esa 13,1 foiz bilan uchinchi o‘rinda turadi. To‘rtinchi o‘rinni 12 foiz bilan WeChat egalladi, ammo shuni ta’kidlash kerakki, bu deyarli butunlay platformaning Xitoydagi mashhurligi bilan bog‘liq.
Izoh (0)