“Daryo”da Mubashshir Ahmad taxallusi bilan tanilgan Alisher Tursunov qidiruvga berilgani haqida xabar berilgandi. Axborot manbasi — Ichki ishlar vazirligi axborot xizmati rahbari Shohrux G‘iyosov qidiruvdagi shaxs Jinoyat kodeksining 244-2-moddasi 1-qismi (diniy ekstremistik, separatistik, fundamentalistik yoki boshqa taqiqlangan tashkilotlar tuzish, ularga rahbarlik qilish, ularda ishtirok etish) bo‘yicha qidiruvda ekanini ochiqlagandi. Masʼul bugun OAVga axborot tarqatilishida xatolik bo‘lganini maʼlum qildi.
“Daryo”ning bu haqdagi so‘roviga javob bergan G‘iyosov axborot bazaga kiritilayotganda texnik xatoga yo‘l qo‘yilganini aytib, “Uchni ikki deb yozib yuborishgan”, dedi.
Shayxontohur tumani IIB tergov bo‘limi tomonidan 2023-yil 11-avgust kuni Tursunov Alisher Ahmatovichga nisbatan Jinoyat kodeksining 244-3- moddasi (diniy mazmundagi materiallarni qonunga xilof ravishda tayyorlash, saqlash, olib kirish yoki tarqatish) bilan jinoyat ishi qo‘zg‘atilgan. 29-avgust kuni unga nisbatan “munosib xulq-atvorda bo‘lish xaqidagi tilxat” ehtiyot chorasi qo‘llanishi sharti bilan qidiruv eʼlon qilingan. Shaxsga qidiruv eʼlon qilingani haqidagi axborot Ichki ishlar vazirligi Huquqiy statistika va tezkor-hisob maʼlumotlar bosh markaziga kiritish jarayonida Jinoyat kodeksining 244-2-moddasi sifatida yozilgan bo‘lib, texnik xatoga yo‘l qo‘yilgani aniqlangan. Hozirda axborot to‘g‘rilangan, deydi masʼul.
Shohrux G‘iyosov “Daryo” jurnalistining “Texnik xatoga yo‘l qo‘ygan xodimga chora ko‘rildimi?”, “Xabar tarqatilganiga ikki kun bo‘ldi, shu vaqt oralig‘ida shu axborotdan xabardorlar, deylik, tergovchi noto‘g‘ri axborot ekanini aytmadimi?”, degan savollariga “So‘rab ko‘ramiz”, deya javob qaytardi.
Mamlakatning “O‘zbekiston Respublikasining Jinoyat, Jinoyat-protsessual kodekslariga hamda O‘zbekiston Respublikasining Maʼmuriy javobgarlik to‘g‘risidagi kodeksiga o‘zgartish va qo‘shimchalar kiritish haqida”gi qonunida yolg‘on axborot tarqatishga qanday javobgarlik borligi maʼlum qilingan.
Unga ko‘ra, shaxsning qadr-qimmati kamsitilishiga yoki uning obro‘sizlantirilishiga olib keladigan yolg‘on axborotni tarqatish, shu jumladan ommaviy axborot vositalarida, telekommunikatsiya tarmoqlarida yoki Internet jahon axborot tarmog‘ida tarqatish, shunday harakatlar uchun maʼmuriy jazo qo‘llanilgandan keyin sodir etilgan bo‘lsa —bazaviy hisoblash miqdorining bir yuz ellik baravarigacha miqdorda jarima yoki ikki yuz qirq soatgacha majburiy jamoat ishlari yoxud ikki yilgacha axloq tuzatish ishlari yoki ikki yilgacha ozodlikni cheklash bilan jazolanadi.
Eslatib o‘tamiz, Alisher Tursunov 2023-yilning 28-dekabr kuni Turkiya politsiyasi tomonidan o‘zi yashab turgan uyidan olib ketilgan va Istanbul viloyati Chatalja tumanida joylashgan Binkilich deportatsiya markaziga joylashtirilgan edi. 2024-yil 21-fevral kuni u deportatsiya markazidan oilasi bag‘riga qaytgan edi.
Mubashshir Ahmad 2023-yil avgustda O‘zbekistonda o‘zi asos solgan “Azon.uz” sayti o‘z faoliyatini to‘xtatganini maʼlum qilgan edi. Shundan so‘ng u noyabr oyida o‘zbek, rus, ingliz va turk tillarida faoliyat yurituvchi “Azon Global” portali faoliyatini yo‘lga qo‘ygan.
Shuningdek, 2020-yil dekabr oyida Turkiyada Abdukarim Mirzayev hibsga olinib, uni deportatsiya qilish haqida qaror chiqarilgan, u 33 kun hibsda saqlangach, qo‘yilgan gumonlar tasdig‘ini topmagani sabab ozodlikka chiqarilgan, so‘ng bir necha oy o‘tib gumonlar rasman olib tashlangan edi.
Izoh (0)