Istanbulda qo‘lbola alkogoldan zaharlanib vafot etgan o‘zbekistonliklar soni 17 nafarga yetdi. Bu haqda Bosh konsulxona matbuot xizmati xabar berdi.
Ma’lum qilinishicha, 17-yanvar kuni Turkiya hududida qalbaki spirtli ichimlik iste’mol qilish oqibatida yana 3 nafar O‘zbekiston fuqarosi (barchasi erkak) vafot etdi. 18-yanvar holatiga ko‘ra, spirtli ichimlikdan zaharlanish sababli vafot etgan o‘zbekistonliklarning umumiy soni 17 nafarga yetdi.
Ularning jasadlarini O‘zbekistonga yuborish uchun Bosh konsulxona tomonidan zarur hujjatlar rasmiylashtirilmoqda hamda oila a’zolariga kerakli yordam ko‘rsatilmoqda.
Shu bilan birga, Istanbul hududidagi shifoxonalarning jonlantirish bo‘limlarida qalbaki spirtli ichimlikdan zaharlanib davolanayotgan O‘zbekiston fuqarolari soni 5 nafarga yetdi. Konsulxona xodimlari ularning holidan xabar olib, yaqinlari va shifoxona ma’muriyati bilan doimiy aloqada bo‘lib turibdi.
“Ba’zi vatandoshlarimiz zaharlangan bo‘lsa-da, uy sharoitida davolanishga harakat qilib, shifoxonaga bormagan holatlar ham aniqlandi. Ularga murojaat qilinganda, shifoxonaga borish moddiy jihatdan qimmatga tushishi mumkinligini aytishdi. Biroq keyinchalik bunday qarorlar buyrak faoliyatining ishdan chiqishi, ko‘rish qobiliyatining yomonlashishi va nafas olishda muammolar yuzaga kelishiga olib kelmoqda”, deyiladi xabarda.
Bosh konsulxona har qanday holatda ham zaharlanish alomatlari sezilganda 112 qisqa raqami orqali tez tibbiy yordam chaqirtirilishi hamda shifoxonaning “qizil hududi” (“kırmızı alan”) orqali qabul qilinishi lozimligini, bu xizmat bepul ekanligini eslatib o‘tdi.
Fuqarolar bilan uzluksiz aloqani ta’minlash maqsadida konsulxonaning quyidagi mobil aloqa raqami +90 553 541 17 17 (24/7 rejimida) ishlamoqda.
Izoh (0)