“Daryo” nashri O‘zbekiston va jahonda sodir bo‘lgan eng muhim voqealarni e’tiboringizga havola etadi.
Ukrainadagi urush 2023-yilda qanday tus oladi? Tahlillar bilan tanishamiz
Ukrainada nizo boshlanganiga bir yil to‘lishi arafasida BBC harbiy tahlilchilar fikrlariga asoslanib, urush 2023-yilda qanday tus olishi borasida o‘z prognozlarini e’lon qildi.
Nashr quyidagi beshta variantni keltirib o‘tdi:
1-variant: Ukraina bosib olingan hududlarning barchasini bahor oxirigacha qaytarib oladi. U holda yaqin oylarda, balki haftalarda Melitopol asosiy jangovar punktga aylanadi, shundan keyin Ukraina qurolli kuchlari Azov dengizigacha borib yetadi va Qrimni Rossiyadan uzib qo‘yadi.
2-variant: Rossiya hal qiluvchi qarshi hujumni amalga oshiradi va uning natijasi urushning borishida muhim omilga aylanadi, biroq Ukraina istalgan vaqtda o‘zining yangi hujumini boshlashi mumkin;
3-variant: Jangovar harakatlar sekinlashadi.Ammo 2023-yil oxiriga kelib, Qrim to‘liq Ukraina nazorati ostiga o‘tishi mumkin;
4-variant: Ikkala tomon ham shiddatli hujumlarni amalga oshiradi. Birinchi navbatda Rossiya bor e’tiborini Donbassga qaratadi, Ukraina esa Melitopol va Lugansk viloyatini qaytarishga urinadi;
5-variant: Urush cho‘zilib ketadi va 2023-yil oxirigacha tugamaydi. Rossiya ichkarisida o‘zgarishlar yuz beradi. Elita nizodan bezor bo'lishi mumkin. Tahlillarga ko'ra AQSH uchun Vyetnam va SSSR uchun Afg‘oniston shunday yakun topgan edi.
Urushning borishi fonida yil yakuni mamlakatlar qanday pozitsiyani o‘z oldiga qo‘ymoqda?
Urushning borishi fonida Rossiya Xavfsizlik kengashi raisi o‘rinbosari Dmitriy Medvedev Rossiyani tark etgan fuqarolarni mamlakatga kiritmaslikni va ularni daromaddan mahrum qilishni taklif etdi
Ayni jarayonda Yaponiya Rossiyadan neft importini qayta yo‘lga qo‘ymoqda Tokio G‘arbning Rossiyaga qarshi sanksiyalariga qo‘shilgan, biroq neft va tabiiy gazga nisbatan qattiq choralar ko‘rishdan o‘zini tiydi. Yaponiya hukumatining ta’kidlashicha, Saxalin 2 loyihasi Yaponiyaga suyultirilgan gaz yetkazib berishning asosiy manbai hisoblanib iste'molning 9 foizini qoplaydi.
So‘nggi ma’lumotlarga ko‘ra Ukrainada fevraldan buyon 702 ta muhim infratuzilma obyektlariga zarar yetgan, mamlakat ichki ishlar vaziri o‘rinbosari Yevgeniy Yenin bunda 24-fevraldan beri harbiy operatsiya olib borayotgan Rossiyani aybladi.
Ukraina 27-dekabr kuni 2023-yil fevral oxiriga qadar BMT doirasida “tinchlik sammiti”ni o‘tkazish tashabbusi bilan chiqdi. Vositachi sifatida Kiyev BMT bosh kotibi Antoniu Guterrishni ko‘rishni xohlaydi. Ukraina tashqi ishlar vaziri Dmitriy Kuleba Rossiya “harbiy jinoyatlari uchun javobgarlikka tortilganidan keyingina” uchrashuvga taklif qilinishi mumkinligini aytdi.
O‘zbekistonda rasmiyatchilik uchun himoyachi “rol”ini o‘ynab beradigan davlat advokatlari faoliyati o‘zgartiriladi
Prezident Shavkat Mirziyoyev Oliy Majlis va O‘zbekiston xalqiga yo‘llagan murojaatnomasida advokatura institutini yanada rivojlantirishga doir bir qator tashabbuslar ilgari surildi.Avvalo davlat hisobidan bepul ta’minlanadigan advokatlarni “elektron tanlash” tizimini to‘liq ishga tushirish zarurligi ta’kidlandi.
Ko‘p hollarda davlat hisobidan yordam ko‘rsatadigan advokat ishda shunchaki “himoyachi roli”ni o‘ynab beradi. Ishda rasmiyatchilik uchun ishtirok etib, davlatdan pulini olib yuraveradi. Shuning uchun bunday “navbatchi” advokatlar tanish tergovchining bitta chaqirig‘i bilan yetib kelib ish hujjatlariga qo‘l qo‘yib ketadi. Natijada bir tarafdan shaxsning huquqlari himoya qilinmay ikkinchi tarafdan davlatning puli bekorga sarf bo‘ladi. Endilikda Sudlarda jinoyat ishi faqat ayblov xulosasi bilan emas, balki himoyachining fikri bilan birga qabul qilinadi.
Ayblov xulosasi, jinoyat ishining yakuniy hujjati bo‘lib, unda asosan ayblanuvchining aybdorligini tasdiqlovchi dalillar, uning aybini og‘irlashtiruvchi ma’lumotlardan iborat bo‘ladi. Ammo ayblovni yengillashtiruvchi holatlar bo‘yicha alohida hujjat tuzilmaydi. Ayblanuvchining o‘zini himoya qilish uchun keltirgan vajlari va ularni tekshirish natijalari ham ayblov xulosasi ichida keltiriladi.
Shu yerda mantiq va adolat buzilyapti. Oqlovga oid ma’lumotlar qanday qilib ayblov xulosasida keltirilishi kerak? Shu sababli ayblov xulosasi bilan birga, himoyachining oqlovga oid fikrini ham hujjatlashtirib ishni sudga yuborish ayblov va qoralovning tengligini ta’minlaydi.
Ayni vaziyatda ayblanuvchining himoyachidan voz kechishi bo‘yicha har bir holat prokuror, sud tomonidan sinchiklab o‘rganiladigan tizim joriy qilinishi nazarda tutilmoqda. Ba’zi holatlarda ayblanayotgan shaxs tashqi bosim ostida himoyasidan go‘yoki “o‘z ixtiyoriga” ko‘ra voz kechadi.Endilikda esa ayblanuvchining himoyachidan nima uchun voz kechayotgani, u o‘z ixtiyori bilan voz kechyaptimi yoki puli yo‘qmi, unga bosim bo‘lganmi, bo‘lmaganmi — bularning barchasi prokuror, sud tomonidan o‘rganiladi
Izoh (0)