Rossiyada politsiya va ta’lim muassasalari migrantlarning farzandlari haqida ma’lumot almashadi. Ichki ishlar vazirligi tegishli qonun loyihasini tayyorladi. Bu haqda “Kommersant” xabar berdi.
Vazirlik migratsiya hisobiga qo‘yilgan chet ellik bolalar ro‘yxatini maktab va kollejlarga topshiradi. Ular esa bolalarni qabul qilish yoki o‘qishdan chetlashtirish to‘g‘risida IIVga xabar beradi. Tashabbus mualliflari fikricha, bu “ularning keyinchalik moslashishi va Rossiya jamiyatiga qo‘shilishi uchun” zarur. Bundan tashqari, u Rossiyada qonuniy yashovchi va rus tilidan imtihon topshirgan bolalarni maktabga qabul qilishni nazorat qilishda ham yordam beradi.
17-fevral kuni IIV davlat tuzilmalariga migrantlarning bolalari haqida ma’lumot almashish majburiyatini yuklovchi qonun loyihasini e’lon qildi. Migratsiya idoralari chet ellik bolalarning ro‘yxatdan o‘tgani yoki chiqarilishi haqida mahalliy ta’lim idoralariga ma’lumot berib boradi.
Qonun loyihasi prezident Putinning oktyabr oyida migratsiya siyosatini takomillashtirish bo‘yicha bergan topshiriqlari asosida ishlab chiqilgan. Dumaning MDH ishlari bo‘yicha qo‘mitasi rais o‘rinbosari Konstantin Zatulin buni 2024-yil oxirida Putin imzolagan “Ta’lim to‘g‘risida”gi qonunga kiritilgan o‘zgartirishlar bilan bog‘laydi. U Rossiya maktablariga faqat qonuniy migratsiya maqomiga ega bo‘lgan va rus tilini bilish bo‘yicha testdan o‘tgan bolalarni qabul qilishga ruxsat beradi.
Izoh (0)