Rossiya Ukraina bilan muzokaralarni qayta boshlashga tayyor. Bu haqda Rossiya Xavfsizlik kengashi raisi o‘rinbosari Dmitriy Medvedev Xitoy rahbari Si Szinpin bilan uchrashuvdan so‘ng bayonot berdi.
Medvedevning taʼkidlashicha, agar Kiyev “yer yuzida hukm surayotgan voqelikni” qabul qilsa va Putinning ilgari aytgan shartlarni hisobga olsa, Moskva muloqotni boshlaydi.
Putin iyun oyida muzokaralar jarayonini boshlash uchun bir qator shartlarni ilgari surgan edi. Xususan, Rossiya qisman bosib olgan, lekin to‘liq nazorat qilmaydigan hududlardan Ukraina qo‘shinlarining olib chiqilishi; Kiyevning NATOga kirishdan bosh tortishi. Bu takliflar Ukraina tomonidan darhol rad etilgan.
18-oktyabr kuni BRIKS mamlakatlari jurnalistlari bilan uchrashuvda Putin 2022-yil bahorida taklif qilingan shartlar asosida mojaroga barham berish masalasini muhokama qilishga tayyorligini ma’lum qilgan edi. Keyinroq Qozondagi BRIKS sammitidan so‘ng u yana muzokaralar uchun ochiqlikni, jumladan, “oqilona murosaga kelish” imkoniyatini qayd etgan.
Avvalroq Financial Times Kiyevdagi rasmiylar NATOga a’zo bo‘lish evaziga Ukraina hududlarining bir qismini Rossiyaga berish masalasini muhokama qilayotgani haqida xabar bergan edi.
“Kiyevning ba’zi amaldorlari Rossiya nazorati ostidagi barcha hududlarni qaytarib olish uchun shaxsiy tarkib, o‘t ochish kuchi va G‘arb ko‘magining yetishmasligidan xavotirga tushmoqda”, deyilgan maqolada.
Ta’kidlanishicha, Rossiya “Ukraina hududining taxminan beshdan bir qismi ustidan amaldagi nazoratni saqlab qolishi” haqidagi kelishuv muhokama qilinmoqda. Hududlar evaziga Kiyev xavfsizlik kafolatlarini olishni kutmoqda. Ukrainaning NATOga a’zo bo‘lishi masalasi ham ko‘tarilishi mumkin.
Izoh (0)