Rossiya prezidenti Vladimir Putin Ukrainadagi urushdan maqsad rus xalqini birlashtirish ekanini aytdi. U “Rossiya 1” telekanaliga bergan intervyusida bu haqda gapirdi.
Putinning aytishicha, Rossiya 2014-yildagi “davlat to‘ntarishi”dan keyin Ukrainada yashovchilarni “himoya qilishga” majbur bo‘lgan. U Ukrainadagi urush zamirida “geosiyosiy raqiblarning Rossiyani, tarixiy Rossiyani ajratib olishga qaratilgan siyosati” yotganini bildirdi.
“Bo‘lib tashla, hukmronlik qil. Ular har doim shunday qilishga harakat qilgan va hozir ham bunga intilmoqda. Bizning maqsadimiz esa boshqa narsa — rus xalqini birlashtirish”, — dedi Kreml rahbari.
Rossiya xavfli chiziqqa yaqinlashyaptimi, degan savolga Putin shunday javob bergan: “Menimcha, bu unchalik ham xavfli emas. Biz to‘g‘ri yo‘nalishda harakat qilyapmiz, milliy manfaatimiz, fuqarolarimiz, xalqimiz manfaatlarini himoya qilmoqdamiz, deb hisoblayman. Fuqarolarimizni himoya qilishdan boshqa ilojimiz yo‘q”, — dedi u.
Ukrainadagi urush — Rossiya bayonotlari
Rossiya necha bor ularning armiyasi Ukraina qurolli kuchlari bilan emas, balki NATO qo‘shinlari bilan jang qilayotganini ta’kidlagan. Rossiyaning Ukrainaga bostirib kirishining boshida Kreml urushni “demilitarizatsiya” va “denazifikatsiya”ni amalga oshirish zarurati bilan izohlagandi.
16-dekabr kuni Rossiya Xavfsizlik kengashi raisi o‘rinbosari Dmitriy Medvedev Ukrainaga qarshi urushda fuqarolik infratuzilmasi obyektlari ham “qonuniy harbiy nishon” bo‘lishi mumkinligini aytgan.
23-dekabr kuni Rossiya prezidentining matbuot kotibi Dmitriy Peskov rus qo‘shinlari Ukrainani “demilitarizatsiya qilish”da “katta yutuqlarga erishganini” bildirgan.
Mavzuga doir:
Izoh (0)