Xitoy va Hindiston AQSH sanksiyalari ta’sir qilmagan tankerlar uchun yuk tashish narxining oshishi fonida mart oyida yetkazib beriladigan Rossiya neftini xarid qilishni to‘xtatdi. Bu haqda treyderlarga tayanib, Reuters xabar bermoqda.
Tinch okeanidagi Kozmino portidan eksport qilinadigan Rossiyaning ESPO nefti narxi ICE Brent bilan solishtirganda barreliga 3-5 dollarga qimmatlashdi. Bu kema charter stavkalarining keskin oshishi bilan bog‘liq. Masalan, Aframax tipidagi tanker uchun Xitoy yo‘nalishi bo‘yicha narxlar bir necha million dollarga oshgan.
Joriy yilning 10-yanvar kuni Qo‘shma Shtatlar Rossiyaning neft va gaz eksportidan tushadigan daromadiga ta’sir ko‘rsatuvchi Amerika sanksiyalarining shu kungacha eng keng qamrovli paketini joriy qildi. Cheklovlar Rossiyaning to‘rtta yirik neft kompaniyasidan ikkitasi – “Gazprom neft” va “Surgutneftegaz”ga hamda G‘arb sanksiyalarini buzgan holda Rossiya neft va neft mahsulotlarini tashiyotgan 180 dan ortiq tankerlarga taalluqli edi. Cheklovlar tanker yuklari narxining oshishiga olib keldi, chunki Xitoy va Hindistondagi ba’zi xaridorlar va portlar sanksiyalangan kemalarni qabul qilishdan bosh torta boshladi.
Hindistonning Bharat Petroleum Corp Ltd kompaniyasining bosh moliyaviy direktori kompaniya har oyning o‘rtalarida bo‘lgani kabi mart oyida yetkazib berish bo‘yicha hech qanday yangi taklif olmaganini aytdi.
Rossiya nefti 2024-yilda Hindiston importining 36 foizini va Xitoy importining deyarli beshdan bir qismini tashkil etdi.
Kpler tahliliy firmasi ma’lumotlariga ko‘ra, so‘nggi sanksiyalar Rossiyaning dengizdagi neft eksportining qariyb 42 foizini, asosan, Xitoyga tashiydigan tankerlarga taaluqli. AQSH avvalroq Hindistondan 27-fevralgacha Rossiya nefti yuklangan tankerlarni tushirishni va 12-martgacha ular uchun to‘lovlarni amalga oshirishni talab qilgan edi. Xitoyda ham vaqtinchalik sanksiyalar yengillashganiga qaramay, cheklangan kemalar neftni tushirishda kechikishlarga duch kelmoqda.
Kpler’ning aniqlik kiritishicha, Xitoyning Rossiyadan xom neft importi o‘tgan hafta olti oylik eng past darajaga tushib, kuniga 717 ming barrelni tashkil qilgan.
Hindistonga kelsak, Rossiya xom neftini yetkazib berishda kuniga 450 ming barrelgacha uzilishlar kuzatilmoqda, deya qayd etadi Reuters.
Agentlikka ko‘ra, Hindiston neftni qayta ishlash zavodlari mart va aprel oylari uchun Yaqin Sharq, Afrika va AQSHdan muqobil yetkazib berishni qidirmoqda, chunki ular Rossiyadan yetkazib berish qisqarishini taxmin qilmoqda.
Izoh (0)