Saudiya Arabistoni poytaxtida AQSH va Rossiya delegatsiyalarining muzokaralari yakuniga yetdi.
Uchrashuvda ishtirok etgan Rossiya prezidenti yordamchisi Yuriy Ushakov muzokaralar samarali o‘tganini, tomonlar kelajakda bir-birining manfaatlarini inobatga olishga kelishib olganini ma’lum qildi.
Biz shunchaki bir-birimizning manfaatlarimizni hisobga olishga kelishib oldik. Shu bilan birga, ikki tomonlama munosabatlarni rivojlantirish ustida ham ishlaymiz, chunki bu Moskva va Vashington uchun birdek muhim, dedi Ushakov jurnalistlarga.
Delegatsiyalar, jumladan, Rossiya va AQSH rahbarlari Vladimir Putin va Donald Trampning uchrashuvini ham muhokama qilishdi.
Bu masala ko‘rib chiqildi, biz bunday uchrashuv uchun sharoit yaratish ustida ishlaymiz, dedi Rossiya prezidenti yordamchisi.
Uning so‘zlariga ko‘ra, muzokaralar jarayonida Ukraina masalasi ham ko‘tarilgan. Tomonlar “ushbu mavzu bo‘yicha muzokarachilarning alohida guruhlari o‘z vaqtida aloqaga kirishishi”ga kelishib oldilar.
Muzokaralarda Rossiya tomonidan TIV rahbari Sergey Lavrov va Yuriy Ushakov ishtirok etdi. AQSH tomonidan davlat kotibi Marko Rubio, Markaziy razvedka boshqarmasi direktori Jon Retkliff, milliy xavfsizlik bo‘yicha maslahatchi Mayk Uolts va maxsus vakil Stiv Uitkofflar vakillik qildi.
Kremlga ko‘ra, muzokaralar birinchi navbatda Rossiya-AQSH munosabatlarini tiklashga, shuningdek, Ukraina mojarosi bo‘yicha ehtimoliy aloqalar istiqbollariga bag‘ishlangan.
Putin Zelenskiy bilan bir shartga ko‘ra uchrashishga rozi
Rossiya prezidentining matbuot kotibi Dmitriy Peskov Putin Ukraina yetakchisi Vladimir Zelenskiy bilan muzokaralar olib borishga tayyorligini, biroq avval Ukraina prezidentining qonuniyligi masalasini ko‘rib chiqish zarurligini qayd etdi.
Kreml vakilining so‘zlariga ko‘ra, Putin “zarurat tug‘ilganda Zelenskiy bilan ham muzokaralar olib borishga tayyorligini bir necha bor aytgan”.
Shu bilan birga, Zelenskiyning o‘zining qonuniyligiga shubha tug‘dirish ehtimoli mavjudligini ko‘rsatuvchi haqiqatni inobatga olgan holda, kelishuvlarni huquqiy jihatdan rasmiylashtirishni jiddiy muhokama qilish lozim, deya qo‘shimcha qildi Peskov.
Vladimir Putin bir necha bor Zelenskiyning qonuniyligi “tugagani, chunki Ukrainada yangi saylovlar o‘tkazilmagani”ni ta’kidlagan.
Moskva yuridik kuchga ega hujjatlarni imzolashdan avval “kim bilan munosabat o‘rnatish mumkin va zarurligini” tushunib olishi kerak, degan Rossiya yetakchisi.
Zelenskiy 2025-yil 14-fevralda Myunxen xavfsizlik konferensiyasida so‘zga chiqib, tinchlik muzokaralari doirasida faqat yagona rossiyalik — Vladimir Putin bilan uchrashishini ma’lum qilgan edi.
Bir kun avval NBC nashri AQSH Ukraina delegatsiyasini Saudiya Arabistonidagi Rossiya bilan muzokaralarga taklif etmagani, chunki Vashington Moskva va Kiyev vakillari bilan alohida ikki tomonlama uchrashuvlar o‘tkazib, keyinchalik qo‘shma uchrashuv tashkil etmoqchi ekani haqida yozgan edi.
Izoh (0)