Xitoy kompaniyasi tomonidan ishlab chiqilgan DeepSeek sun’iy intellekt modeli Xitoyning ByteDance kompaniyasiga janubiy koreyalik foydalanuvchilar ma’lumotlarini uzatdi. Bu haqda Janubiy Koreyaning Yonhap axborot agentligi mamlakatning shaxsiy ma’lumotlarni himoya qilish komissiyasiga (PIPC) tayanib xabar bermoqda.
PIPC’ga ko‘ra, DeepSeek’ning janubiy koreyalik foydalanuvchilari ma’lumotlari “uchinchi shaxslar” ixtiyorida bo‘lgan.
Biz DeepSeek ByteDance bilan aloqada bo‘lganini tasdiqladik, deya ta’kidladi PIPC va qaysi ma’lumotlar qanday hajmda uzatilganini hozircha aniqlamaganini aytdi.
Avvalroq PIPC “ma’lumotlarni yig‘ish usullari” bilan bog‘liq xavotirlar tufayli butun mamlakat bo‘ylab DeepSeek sun’iy intellektga asoslangan Xitoy chatbotini yuklashni vaqtincha to‘xtatgan edi. Biroq Komissiyaning xabar berishicha, sun’iy intellekt modeliga qo‘yilgan taqiq ishlab chiquvchilar uni Janubiy Koreyaning shaxsiy ma’lumotlarni himoya qilish to‘g‘risidagi qonunlariga muvofiqlashtirgandan so‘ng bekor qilinadi.
Janubiy Koreya Tashqi ishlar, savdo va atrof-muhit vazirliklari ham xavfsizlik nuqtai nazaridan ichki qurilmalarda DeepSeek’dan foydalanishni taqiqladi.
Shuningdek, PIPC DeepSeek’ning Xitoydagi shtab-kvartirasiga shaxsiy ma’lumotlarni to‘plash bo‘yicha kompaniya siyosati haqida batafsil ma’lumot berish talabi bilan tergov uchun rasmiy so‘rov yubordi.
DeepSeek kompaniyasi joriy yilning 20-yanvar kuni ochiq kodli bepul R1 sun’iy intellekt modelini taqdim etdi. Butun dunyo bo‘ylab keng tarqalgan sun’iy intellekt modeli AQSH ChatGPT’sini ortda qoldirib, eng ko‘p yuklab olingan dasturga aylandi.
Izoh (0)