O‘zbekistonda OTM bitiruvchilarini ishga joylashish bo‘yicha dastur amalga oshiriladi

O‘zbekistonda OTM bitiruvchilarini ishga joylashishiga ko‘maklashuvchi “Kelajakka qadam” dasturi amalga oshiriladi. Bu haqda 14-fevralda imzolangan prezident qarorida belgilandi.

“Oliy ta’lim tashkilotlari bitiruvchilarining ishga joylashishiga ko‘maklashish bo‘yicha qo‘shimcha chora-tadbirlar to‘g‘risida”gi qarorga ko‘ra, dastur quyidagilarni nazarda turtadi:

• o‘z biznes g‘oyalarini amalga oshirish istagi bo‘lgan oliy ta’lim tashkilotlarining bitiruvchi bosqich talabalari uchun biznes g‘oyani tayyor loyihagacha olib borish jarayonida to‘liq hamrohlik qilish, shu jumladan, qulay shartlarda moliyalashtirish;
• oliy ta’lim tashkilotlarining bitiruvchi va quyi bosqich talabalari o‘rtasida sohalar bo‘yicha ochiq tanlovlar o‘tkazish va g‘oliblarni ish bilan ta’minlashga ko‘maklashish.

Bunda salohiyatli ish beruvchi tashkilotlar, shu jumladan, yirik korxonalarning oliy ma’lumotli mutaxassislarga ehtiyojini aniqlash va mutaxassislarga qo‘yiladigan talablarni shakllantirish amaliyoti yo‘lga qo‘yiladi.

Tanlov g‘oliblarini salohiyatli ish beruvchi tashkilotlar buyurtmasiga ko‘ra individual kasbiy ta’lim dasturlari asosida kasbga dastlabki tayyorlash tadbirlari moliyalashtiriladi. Individual kasbiy ta’lim dasturlarida ishlab chiqarish obyektlarida amaliyot o‘tash va chet eldagi oliy ta’lim tashkilotlarida qisqa muddatli o‘quv kurslarida qatnashish imkoniyati yaratiladi.

O‘zbekistonda yoshlar ishsizligiga barham berish

Shavkat Mirziyoyev 14-fevral kuni yoshlar bilan muloqot o‘tkazganida 2025-yilda O‘zbekistonda yoshlar ishsizligiga barham berish ishlari yangi bosqichga ko‘tarilishini ta’kidlagandi. Prezident yoshlarni kasb va tilga o‘qitib, yuqori daromadli ishlarga joylashtirish maqsadida bu yil bandlik bo‘yicha katta dastur qabul qilinganini, buning uchun jami 126 trillion so‘m yo‘naltirilayotganini aytgandi.

Yig‘ilishda ma’lum qilinishicha, har yili mehnat bozoriga 600 mingdan ortiq yoshlar kirib kelayotgani, 2030-yilga borib bu ko‘rsatkich 1 million nafarga yetishi, bu davlat va jamiyat zimmasiga katta mas’uliyat yuklashi ta’kidlangandi. Bugungi kunda oliygohlarni tugatayotgan 90 ming yoshlar mutaxassisligi bo‘yicha ish topishda qiynalayotgani, shu bois, oliygoh bitiruvchilari bandligini ta’minlash bo‘yicha yangi tizim yaratilayotgani aytilgandi.

Rahbarlar yoshlar ishsizligining salbiy oqibatlaridan, o‘z vaqtida band bo‘lmagan yoshlar bilib-bilmay nomaqbul ishlarga qo‘l urishi, diniy radikalizm ta’siriga tushib qolishi, jinoyat ko‘chasiga kirishi mumkinligidan ogohlantirildi.