Jizzax viloyatida qalbaki 51 000 AQSH dollarini o‘tkazmoqchi bo‘lgan shaxslar ushlandi, deb xabar bermoqda Prokuratura departamenti.
Ma’lum qilinishicha, holat Bosh prokuratura huzuridagi departamentning Jizzax shahri bo‘limi va boshqa huquqni muhofaza qiluvchi organ xodimlari hamkorligida o‘tkazilgan tezkor tadbirda aniqlangan. Ikki fuqaro S.G.ga 100 AQSH dollarlik kupyuradagi jami 51 000 qalbaki AQSH dollarini hamda 200 ming so‘mlik kupyurali qalbaki 100 mln so‘mni jami 93 mln so‘mga sotishga kelishgan bo‘lgan.
Shundan ular 39,2 mln so‘mni bank plastik kartasiga o‘tkazib olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 25, 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) bilan jinoyat ishi qo‘zg‘atilib, tergov harakatlari o‘tkazilmoqda.
Qalbaki kupyuralar savdosi
Avvalroq Toshkent viloyatida 10 ming dollarni noqonuniy sotishga uringan shaxslar ushlangani, Toshkent viloyatida qalbaki 100 ming so‘mlik kupyuralarni tayyorlash bilan shug‘ullangan oila aniqlangani to‘g‘risida xabar berilgandi.
Shuningdek, Toshkent viloyatida olgan qarzi o‘rniga qalbaki 3,2 ming dollar bergan shaxs ushlangandi. Bundan tashqari, Andijon viloyatining Asaka tumanida qalbaki 100 million so‘m pulni 57 million so‘mga sotishga uringan shaxslar qo‘lga olingan.
Shu bilan birga, Farg‘ona viloyatining Qo‘shtepa tumanida qalbaki 100 ming so‘mlik kupyura tayyorlab, uni muomalaga kiritgan ayol ushlangandi.
Izoh (0)