Jizzaxda 588 mln so‘mlik sifati kafolatlanmagan dorilar sotuvga chiqib ketishining oldi olindi
Jizzax viloyatida 588,5 mln so‘mlik sifati kafolatlanmagan dori vositalari to‘xtatib qolindi, deb xabar bermoqda Prokuratura departamenti.
Foto: Prokuratura departamenti
Unga ko‘ra, holat Bosh prokuratura huzuridagi departamentning Yangiobod tumani bo‘limi va IIB xodimlari hamkorligida “Sangzor-15” YPX maskanida o‘tkazilgan tezkor tadbirda aniqlangan. Samarqand—Toshkent yo‘nalishida harakatlanib kelayotgan Isuzu yuk mashinasi to‘xtatilib ko‘zdan kechirilgan.
Shunda fuqaro A.U. tegishli hujjatlari bo‘lmagan umumiy bahosi 588,5 mln so‘mlik jami 1 000 quti dori vositasini Toshkent shahrida noqonuniy dori vositalari savdosi bilan shug‘ullanib kelgan fuqaro G.B.ga sotishga kelishib olib ketayotgan aniqlangan. Ushbu dori vositalari ashyoviy dalil sifatida olingan.
Mazkur holat yuzasidan Jinoyat kodeksining 25, 186-3-moddasi (sifatsiz yoki qalbakilashtirilgan dori vositalarini yoxud tibbiy buyumlarni o‘tkazish maqsadida ishlab chiqarish, tayyorlash, olish, saqlash, tashish yoki o‘tkazish) bilan jinoyat ishi qo‘zg‘atilib, tergov harakatlari o‘tkazilmoqda.
Dori vositalarining noqonuniy savdosi
O‘zbekistonda 2024-yilning 10 oyida 2,5 mingdan ziyod qalbakilashtirilgan dorilar aniqlangan edi. Taqdim qilingan dori vositalari va tibbiy buyumlar o‘rnatilgan tartibda laboratoriya tekshiruvidan o‘tkazilganda, tahlil natijalariga ko‘ra, noqonuniy muomalada bo‘lgan:
5 958 o‘ram — davlat ro‘yxatidan o‘tgan va muvofiqlik sertifikati mavjud;
17 925 o‘ram — davlat ro‘yxatidan o‘tmagan va muvofiqlik sertifikati mavjud bo‘lmagan;
557 o‘ram — yorliqlash ko‘rsatkichi bo‘yicha nomuvofiq (kontrafakt);
1 549 o‘ram — yaroqlilik muddati tugagan (sifatsiz);
2 524 o‘ram — qalbakilashtirilgan umumiy 52 396 o‘ram farmatsevtika mahsulotlarining tibbiyot amaliyotida qo‘llash mumkin emasligi yuzasidan xulosa berildi.
Ushbu sifatsiz, qalbakilashtirilgan va O‘zbekistonga noqonuniy kirib kelgan farmatsevtika mahsulotlari aylanmasining oldi olindi.
Avgust oyida Andijonda noqonuniy dori vositalari savdosi bilan shug‘ullanganlarga hukm o‘qilgandi. Dori vositalarining umumiy qiymati 1 mlrd 616 mln 802 ming so‘mni tashkil qilgan. Jinoyat ishlari bo‘yicha Qo‘rg‘ontepa tuman sudi tomonidan fuqaroga nisbatan 5 yil hamda sherigiga nisbatan 3 yil muddatga ozodlikdan mahrum qilish jazosi tayinlangan.
Sentyabr oyida Toshkent viloyatining Ohangaron tumanida noqonuniy dori vositalari savdosi bilan shug‘ullanib kelgan shaxslar ushlangan. Oktyabr oyida Toshkent shahrida 2,2 mlrd so‘mlik yaroqlilik muddati o‘tgan dori vositalarini muomalaga kiritilishining oldi olingandi.
Shuningdek, Xorazmda qariyb 240 mln so‘mlik dorilar noqonuniy sotilishining oldi olindi. Bundan tashqari, Toshkent shahrining Chilonzor tumanida 4 000 quti qalbaki dori vositalarini sotayotgan shaxslar ushlandi.
Izoh (0)