“Korrupsiya bor joyda hamma yutqazadi” — Yevropa Ittifoqining O‘zbekistondagi delegatsiyasi hamkorlik bo‘limi boshlig‘i Vim Riepma

Korrupsiya bor joyda hamma yutqazadi yoki juda kamchilik yutib, katta qism mag‘lub bo‘ladi. Bu haqda 10-sentyabr kuni Toshkent shahrida bo‘lib o‘tgan aksilkorrupsiya sohasida Xalqaro media forumida Yevropa Ittifoqining O‘zbekistondagi delegatsiyasi hamkorlik bo‘limi boshlig‘i Vim Riepma aytib o‘tdi, deya xabar bermoqda “Daryo” muxbiri.

Janob Vim Riepmaning aytishicha, media korrupsiya holatlarini yuzaga chiqarishi mumkin. Masalan, ular korrupsiya holatlarini aniqlab, nima bo‘layotganini aholiga tushuntirib beradi.

Ikkinchidan, korrupsiyaga qarshi kurash siz, men, barchamizdan boshlanadi. Chunki biz kundalik turmushimizda korrupsiyaga olib keluvchi holatlar bilan to‘qnash kelamiz mumkin. Masalan, shifoxonaga yoki ta’lim dargohlariga borganimizda bizdan pul so‘rashlari yoki mening egallab turgan lavozimimdan kimgadir pul undirish uchun foydalanishi mumkin. Bunday paytda menda ular yurgan yo‘ldan yurish yoki korrupsiyaga yo‘q deyish qarorini qabul qilish qoladi. Aynan ushbu holatlarda medianing roli ortadi. Ular aynan korrupsiyaning xavfi haqida odamlarga tushuncha berishi kerak, dedi Janob Vim Riepma.

Yevropa Ittifoqi mas’ulining alohida ta’kidlashicha, korrupsiya bor joyda hamma yutqazadi yoki juda kamchilik yutib, katta qism mag‘lub bo‘ladi.

Ko‘pchilik kambag‘allashadi, kam qism esa boyib ketishi mumkin. Yo‘qotish faqat pul ko‘rinishida emas, hayot yoki sog‘liq bilan ham bo‘ladi.

Agar to‘g‘ri davolanolmasangiz, uyingiz turli baxtsiz hodisalarga bardoshli qilib qurilmagan bo‘lsa, dorixonadan oladigan doringiz sifatsiz bo‘lsa (bolalar o‘limiga sabab bo‘lgan shamollashga qarshi qo‘llanilgan dori misolida), bu hayotingizga ta’sir qiladi. Aynan mana shu korrupsiyaning oqibatlari hisoblanadi.

Korrupsiyaga qarshi kurashuvchilarning safida bo‘ling. O‘zingiz va davlatingiz uchun korrupsiyaga qarshi kurashing, deydi u.

Mazkur forumda ishtirok etgan Korrupsiyaga qarshi kurashish agentligi direktori Akmal Burxonov korrupsiyaga qarshi kurashishda OAV va jurnalistlar imkoniyatlaridan kengroq foydalanish maqsadida ular turli aksilkorrupsiya tuzilmalari faoliyatiga jalb qilinganini aytib o‘tgan edi.